NDRYSHON LIGJI Pensionet, skema e re për ish- të përndjekurit
Zbardhet relacioni i Qeverisë për skemën e re të pensioneve. Kategoritë e ish- të përndjekurve që përfitojnë dhe dokumentet që duhen
Qeveria ka dërguar në Kuvend ligjin e ri për pensionet e të përndjekurve politikë. Gazeta zbardh sot të plotë relacionin me ndryshimin e kushteve për të përfituar pension.
Bëhet fjalë për ish- të përndjekurit, që kanë punuar me detyrim në miniera gjatë kohës së komunizmit. Sipas qeverisë, “Ish- të dënuarit politikë që kanë punuar në miniera, në nëntokë, gjatë kohës së vuajtjes së dënimit politik, çlirohen nga detyrimi për ta provuar këtë me anë të vërtetimit. Projektligji parashikon njohjen e kohës së vuajtjes së dënimit politik në burgjet ku punohej në miniera, në nëntokë si punë e kryer në miniera, në nëntokë. Periudha e vuajtjes së dënimit, për efekt pensioni, njihet sa dyfishi i periudhës së qëndrimit në këto burgje dhe paga llogaritet sa paga e punës në miniera. Vërtetimi për kohën e vuajtjes së dënimit në burgjet ku punohej në miniera, në nëntokë lëshohet nga Ministria e Brendshme në bashkëpunim me Ministrinë e Drejtësisë”. Në total, kosto e qeverisë për zbatimin e ligjit, apo përfitimi për ish- të përndjekurit është 4 milionë lekë në muaj. RELACIONI I QEVERISË
“Nëpërmjet këtij projektligji, parashikohet që koha e vuajtjes së dënimit të ish- të dënuarve politikë në burgjet ku punohej në miniera, në nëntokë, njihet për efekt pensioni si punë e kryer në miniera, në nëntokë. Periudha njihet sa dyfishi i periudhës së qëndrimit në këto burgje. Paga llogaritet sa paga e punës në minierë. Nga të dhënat zyrtare të mbledhura nga Instituti i Integrimit të ish- të Përndjekurve Politikë rezulton se nuk kanë marrë dokumentet, vërtetimet për vendin e punës ku është kryer dënimi, 264 persona, të cilët kanë vuajtur dënimin mesatarisht 7.5 vjet, në burgjet ku punohej në miniera, në nëntokë. Komisioni përkatës në Ministrinë e Brendshme, për vërtetimin e viteve të punës në miniera të kryera nga ish- të dënuarit politikë, i cili specifikonte dhe punën që kishte kryer i dënuari, i krijuar në bazë të vendimit nr. 445, datë 13.12.1991, të Këshillit të Ministrave, ‘ Për vërtetimin e kohës së vuajtjes së dënimit admin- istrativ nga ish- të internuarit dhe të dëbuarit për çështje politike, kur mungojnë dokumentet zyrtare’, të ndryshuar, ka funksionuar deri në datën 31.12.2000. Për zgjidhjen e problematikës për njohjen e viteve të punës dhe, si rrjedhojë, për njohjen e së drejtës për të përfituar pension për punën e kryer në miniera, në nëntokë nga ish- të dënuarit politikë gjatë kohës së vuajtjes së dënimit, propozohet përmirësimi i ligjit nr. 7514, datë 30.9.1991, ‘ Për pafajësinë, amnistinë dhe rehabilitimin e ish- të dënuarve politikë nga regjimi komunist’, të ndryshuar”.