“S’më gjykon dot as Rama, as ambasadorët”
Kryemadhi: Për mua, rëndësi ka vetëm gjykimi i shqiptarëve
Kryetarja e LSI- së, Monika Kryemadhi, ka komentuar dje vendimin e Prokurorisë dhe Policisë për të proceduar penalisht të gjithë deputetët e opozitës dhe qytetarët që morën pjesë në mosbindjen civile. Kryemadhi tha se procedimi i Edi Ramës nuk e shqetësonte fare dhe se ajo mund t’i trembet vetëm gjykimit të qytetarëve. “Mua nuk më shqetëson fare procedimi penal, e vetmja gjë është që kur të bëjmë atë formularin e dekriminalizimit, do ta deklarojmë që jemi proceduar penalisht nga Prokuroria e Edi Ramës. Por ajo çka dua të them është që sistemi i drejtësisë është një sistem që vërtet sot është në duart e një grupi njerëzish, të cilët do të kenë probleme me drejtësinë e tyre midis njëri- tjetrit dhe më pas do të kenë probleme dhe me drejtësinë e shqiptarëve. Sado që të jetë investuar financiarisht, por edhe politikisht për ta kapur këtë sistem drejtësie, sistemin e drejtësisë së shqiptarëve nuk e kap dot askush, sepse është populli ai që vendos drejtësinë më të madhe. Mua nuk më gjykon dot as Edi Rama, as ambasadorët, as Brukseli, as Amerika. Mua më gjykojnë vetëm shqiptarët me votë dhe gjykimi i tyre për mua është jo vetëm qesharak”, ka thënë ajo. Për kryetaren e LSI- së, askush nuk mund ta kërcënojë atë. “Nuk kërcënon dot as Edi Rama, as Arta Marku, as Fatmir Xhafa as Policia e drogës, e shtetit dhe e diktaturës. Unë këtu jam, në rrugët e Tiranës jam. Si të duan, daç me Polici, daç pa Polici, Monika Kryemadhin e kanë në këmbë me çizme dhe pa çizme”, ka thënë dje Kryemadhi.