Mikel Shallari bëhet bashkëpunëtor i drejtësisë, hetimet drejt fundit
Mikel Shallari, ekzekutori i komisar Artan Cukut, ka marrë statusin e bashkëpunëtorit të drejtësisë. Këtë e konfirmojnë burime të “Panoramës” brenda Prokurorisë së Krimeve të Rënda. Të njëjtat burime thonë se hetimet janë drejt mbylljes për vrasjen e bujshme, por ka ende paqartësi për kompetencat. Shkak është vendimi unifikues i Gjykatës së Lartë, që i jep Krimeve të Rënda kompetencat e SPAK- ut deri në krijimin e këtij të fundit. Në rast se Krimet e Rënda shpallin moskompetencë për dosjen, atëherë ajo do të kalojë drejt Prokurorisë së Tiranës. Në nëntor të vitit të shkuar, Mikel Shallari pranoi të bashkëpunojë dhe madje kërkoi dy herë lirim, për shkak se në burg i rrezikohej jeta, sipas avokatit të tij. Mikel Shallari pati deklaruar në Prokurori se për vrasjen ishte paguar. Shallari ka thënë se në kontakt me porositësit e atentatit kishte rënë përmes një të afërmi të tij. Ky i fundit kishte organizuar një takim mes tij dhe dy porositësve, të cilët, sipas autorit të dyshuar, ishin njëri nga Vlora dhe tjetri nga Fieri. Takimi është zhvilluar në një lokal në kryeqytet dhe se porositësit kërkonin dikë që nuk kishte hesape me drejtësinë, në mënyrë që të mos kapej nga Policia. Ata i kishin premtuar 15 mijë euro për vrasjen e Artan Cukut, 3500 nga të cilat Shallari ka thënë se i mori paradhënie. Gjithashtu, i riu ka thënë se porositësit u siguruan që ai të pajisej me dy armë zjarri pistoletë dhe me një automjet për atentatin. Shallari ka thënë se nuk i mban mend fytyrat e porositësve, pasi ata e kishin detyruar që të mos i shihte, në të kundërt do ta vrisnin. I njëjti kërcënim vlente edhe në rast se ai tregonte emrat e tyre, në qoftë se arrestohej. “Do të të vras, po ma përmende emrin, mbaroje këtë punë”, mësohet t’i ketë thënë njëri prej porositësve Shallarit gjatë takimit.