Skënderbeu zhduk fantazmat e krizës, tripletë në Vlorë
Gavazaj shënon supergol, duartrokitet pas zëvendësimit
Skënderbeu ia doli të fitojë me shumë lehtësi kryendeshjen e javës së 28- të në Kategorinë Superiore, duke mposhtur pastër Flamurtarin me shifrat 0- 3.
Humbja në Shkodër dhe ajo në ndeshjen e parë gjysmëfinale në Kupën e Shqipërisë, u lanë pas krahëve në 90 minutëshin që korçarët luajtën në mënyrë perfekte në Vlorë. Tri pikë në ndeshjen e parë të fazës së tretë, gola, spektakël dhe mbi të gjitha një farë çlirimi psikologjik i lojtarëve dhe skuadrës korçare, që premton se kriza është lënë pas dhe tashmë ekipi është rikthyer i fokusuar te fusha dhe rezultatet, për të lënë mënjanë problemet juridike dhe çështjen e dënimit.
NDESHJA
Gjithçka u bë e lehtë, pasi Soue shënoi që në 30 sekondat e para, duke ia bërë më të lehtë ekipit të Dajës. Vetëm 11 minuta më vonë, mendoi edhe Dita që të shënojë sërish për të tijtë, pas një aksioni model nga sulmuesit e Skënderbeut. Kaq për pjesën e parë, me Flamurtarin që nuk mund të reagonte aspak. Dy gola dhe administrimi i korçarëve bënë që Flamurtari të ishte thuajse inekzistent në fushën e lojës. Me fillimin e së dytës, Skënderbeu shënoi sërish me anë të Gavazajt, që dhuroi një gol mjaft të bukur, teksa e mori topin vetë dhe kaloi të gjithë mbrojtjen, duke përfunduar aksionin me mposhtjen e portierit Nurkoviç. Flamurtari u duk i pafuqishëm në këtë sfidë, me Duron që u duk i tërbuar gjatë takimit me lojtarët e tij. Korçarët zhdukin çdo fantazmë të krizës, ndërsa vlonjatët humbasin çdo busull drejt suksesit. "Asnjë repart nuk funksionoi", u shpreh trajneri Duro, i cili ka lëshuar sinjalin SOS.