Ambasadori Lu në zyrën e Metës: Frymë e përzemërt dhe miqësore
“Diskutuam mbi marrëdhëniet e shkëlqyera mes dy vendeve, çështjet aktuale të sigurisë rajonale dhe ndërkombëtare”
Një ditë pas bërjes publike në media të letrës që ish- Prokurori i Përgjithshëm, Adriatik Llalla, i kishte dërguar Kongresit Amerikan ku citonte një kërkesë të ambasadorit Lu për arrestimin e Ilir Metës, dje, kryediplomati amerikan takoi Ilir Metën në Presidencë.
Takimi mes tyre ka zgjatur rreth 60 minuta, ndërsa Presidenca dha një informacion të përgjithshëm rreth çështjeve të diskutuara. Drejtori i Kabinetit të Presidentit, Arben Cici, u shpreh: "Presidenti i Republikës, z. Ilir Meta priti sot në një takim ambasadorin e SHBA- ve në Shqipëri z. Donald LU, me të cilin diskutuan mbi marrëdhëniet e shkëlqyera mes dy vendeve tona dhe mbi çështjet aktuale të sigurisë rajonale dhe ndërkombëtare. Në kuadër të integrimit europian të Shqipërisë, çështjes së rëndësishme të hapjes së negociatave u nënvizua rëndësia e ecurisë dhe implementimit të Reformës në Drejtësi dhe u shkëmbyen mendime rreth situatës aktuale në vend. Fryma e përzemërt, miqësore dhe bashkëpunuese karakterizoi, ashtu si gjithmonë, këtë takim".
LETRA
Ish- Kryeprokurori Adriatik Llalla, në muajin maj të vitit 2017, i ka dërguar një letër zyrtare Kongresit të Shteteve të Bashkuara të Amerikës, në të cilën ka thënë se ambasadori Donald Lu i ka kërkuar arrestimin e Ilir Metës, pa asnjë provë dhe pa asnjë fakt. Në letrën për Nënkomisionin e Kongresit Amerikan për Europën dhe Azinë, i drejtuar nga kongresmeni Dana Rohrabacher, Llalla tregon edhe një herë takimin me Donald Lu në maj të vitit 2015, duke saktësuar se ambasadori ka kërkuar arrestimin e Metës, asokohe në rolin e kryetarit të Parlamentit. Por ambasadori Lu reagoi një ditë më parë, duke i cilësuar deklaratat e Llallës si të pavërteta. "Ish- Prokurori i Përgjithshëm Llalla është një zyrtar publik i korruptuar dhe i diskretituar, i cili është nën hetim aktiv për pastrim parash dhe pasuri masive të pashpjeguara. Nuk është për t'u habitur që vazhdon të flasë kundër Reformës në Drejtësi, sepse tani rrezikon të shkojë në burg për korrupsionin e tij. Ai ka pretenduar se brenda katër muajsh nga mbërritja ime në Tiranë, unë i paskam thënë të arrestojë ish- kryetarin e Kuvendit, Ilir Meta. Kjo është një gënjeshtër absurde nga z. Llalla, pa kurrfarë baze në fakte. Gënjeshtra e tij fyese është një ofendim për Presidentin Meta dhe popullin shqiptar", u shpreh ambasadori Donald Lu.