Mogherini dhe Hahn, të martën në Tiranë
Shefja e Politikës së Jashtme do t’i dorëzojë Ramës raportin e KE
Shefja e Politikës së Jashtme të Bashkimit Europian, Federica Mogherini, do të jetë në Tiranë më 17 prill për t’i dorëzuar personalisht raportin e progresit, që Komisioni Europian ka përgatitur për Shqipërinë. Pritet që ky raport të shoqërohet dhe me rekomandimin e Komisionit Europian për çeljen e negociatave për anëtarësim të BE- së me Shqipërinë. Bashkë me Mogherinin mësohet se në Tiranë do të jetë dhe komisioneri për zgjerimin, Johannes Hahn. Kryeministri Rama, në mënyrë të përsëritur muajt e fundit, ka kërkuar hapjen e negociatave si një akt i merituar nga Shqipëria dhe jo si lëmoshë. “Ne besojmë dhe e meritojmë rekomandimin e plotë dhe të pastër nga KE- ja, shpresoj që edhe vendet anëtare do të përgjigjen pozitivisht dhe në unitet, pasi i kemi bërë me përpikëri detyrat e shtëpisë”, është shprehur Kryeministri Rama. Në muajin shkurt, Tiranën e vizitoi dhe presidenti i Komisionit Europian, Jean Claude Juncker, i cili vlerësoi reformat e qeverisë dhe përmbushjen e detyrave që Brukseli i ka vënë Shqipërisë. “Konstatoj me kënaqësi që Shqipëria nuk pushon së akumuluari progrese, sepse ka marrë shumë reforma strukturore në shumë fusha në jetën tuaj kombëtare, të cilat janë impresionante. Edhe këto progrese janë mbresëlënëse. Nëse këto vazhdojnë në këtë rrugë reformash, kjo do t’i lejojë Shqipërisë që Komisioni Europian të rekomandojë hapjen e negociatave”, tha Juncker në konferencën e përbashkët me Kryeministrin Rama pasditen e 25 shkurtit në Tiranë. Për presidentin e KE- së, viti 2025 nuk është një datë për anëtarësimin e Serbisë dhe Malit të Zi, por një objektiv për çdo vend që arriti kriteret e anëtarësimit. Shqipëria, sipas tij, nuk do të trajtohet ndryshe nga vendet e Ballkanit Perëndimor. Me një gjuhë diplomatike, presidenti i KE- së la të kuptohet se anëtarësimet e reja në BE nuk do të jenë të nxituara si ato të Rumanisë dhe Bullgarisë. “Kam marrë pjesë në nënshkrimin e traktateve të anëtarësimit me Rumaninë, me Bullgarinë, me Kroacinë dhe gjatë këtij rrugëtimi të gjatë kam mësuar të bëj dallimin mes proceseve nervoze dhe atyre që zhvillohen më qetë”, tha Juncker.