Berisha: Vlahutin i kërkoi Llallës edhe arrestimin tim
Ish- Kryeministri Berisha akuzoi dje ambasadoren e BE- së në Tiranë, Vlahutin, se i ka kërkuar ish- Prokurorit të Përgjithshëm arrestimin e tij. I ftuar në studion e ABCNews, Berisha tha se nuk mund të flasë nëse ambasadori Lu i ka kërkuar Llallës arrestimin e Ilir Metës, pasi nuk ka qenë prezent në të.
Si e shikoni letrën e Adriatik Llallës drejtuar Kongresit amerikan se ambasadori Lu i ka kërkuar arrestimin e Ilir Metës?
Që të jem i sinqertë në bisedat mes dy njerëzve ku nuk ka dëshmitarë të tjerë, është shumë e vështirë që të gjesh se ku qëndron e vërteta. Di që sot ambasadori Lu është takuar me Presidentin Meta dhe lëshuan një komunikatë për këtë takim. Kjo pyetje mund t'i bëhej direkt zotit Meta. A beson zoti Meta te kjo akuzë, apo jo? Në rastin tim, unë kam pasur rastin analog me ambasadoren Vlahutin. Unë e besoj plotësisht atë që më është thënë, pavarësisht se ajo e ka mohuar.
Çfarë besoni ju?
Po jua them. Zoti Llalla i ka thënë Presidentit të Republikës Bujar Nishani, se zonja Vlahutin i ka shkuar në zyrë dhe i ka kërkuar arrestimin e Sali Berishës. Unë këtë e kisha marrë vesh nga ambasadorë të huaj. Por nuk e kisha vlerësuar dhe nuk e kisha marrë seriozisht. Por para se t'ia thoshte Adriatiku Presidentit Nishani, të paktën një vit para, një nga ambasadorët e rëndësishëm në Tiranë, ka folur me fjalë zhvlerësuese për Vlahutin. A e besoj unë që zonja Vlahutin i ka kërkuar Adriatik Llallës arrestimin tim? Unë e besoj 100%. Sepse kur ke fiksime dhe komplekse, atëherë nuk di të ndalesh. Zonja ambasadore u thotë një ditë ambasadorëve të BE- së, mos hajdeni në zyrën time me telefona, sepse katër kate më poshtë është Sali Berisha dhe na regjistron bisedat. Që një ambasadore të arrijë deri në këtë logjikë, ka dy arsye: ose është e sëmurë dhe ka opsesione...
Është ambasadorja e BE- së, zoti Berisha?
Sëmuret çdo njeri, në çdo nivel. Por që t'i thotë mendja asaj se Sali Berisha mund të na përgjojë, ajo duhet të ketë një Berishofobi 10 herë më të madhe se ajo e Edi Ramës. Kjo është e turpshme. Ose ajo përpara ambasadorëve ka bërë një provokacion aq banal, sa disa prej tyre kanë qeshur. Kur mora vesh këtë episod, unë mendova se kjo ambasadore është e aftë të bëjë çdo përpjekje. Por unë nuk mund ta traspozoj këtë në rastin e ambasadorit Lu. Në lidhje me ambasadoren Vlahutin, unë kam kërkuar që të bëhet transparenca e 4700 eurove metrit katror vilë në Mullet, gjë që është nga të gjitha vlerësimet korrupsion i mirëfilltë, të paktën me 100% të çmimit. Dhe ky nuk është rasti i parë i korrupsionit të anëtarëve të Komisionit Europian, ka pasur dhe para 12 vitesh dhe Komisioni Europian ka mbajtur qëndrim. Unë kam besim se vendet anëtare do ta hetojnë këtë rast, për të ruajtur integritetin e atyre që u besojnë përfaqësimin.
Mendoni se zoti Lu, sipas analizës tuaj, nisur nga ato që ka thënë zoti Llalla se ka pasur ndërhyrje nga ambasadori për lirimin e dikujt me asete kriminale, të ketë bërë kërkesa për arrestime të figurave politike?
Zoti Llalla e ka akuzuar ambasadorin Lu se i ka kërkuar të pushojë hetimin për një kompani. Kur kam qenë President, kam pasur një rast analog, por jo nga ambasador, por nga i dërguar i posaçëm për të ndërprerë një gjyq. Unë atij iu përgjigja se kjo është një kërkesë staliniste. Unë nuk ta plotësoj dot kurrë, se nuk e imagjinoj dot veten të mbyll një hetim. Nëse ambasadori Lu as e ka mohuar, por as e ka pohuar këtë akuzë, ka shkuar dhe i ka kërkuar Llallës që të ndërpresë hetimin, ambasadori Lu ka kompromentuar, në vlerësimin tim, tërësisht detyrën dhe veten e tij. Ambasadori mund të kërkojë hetim transparent, apo monitorim të hollësishëm të këtij procesi për disa dyshime, por nuk mund të thotë kundër ndalo hetimin. Nga ana tjetër, kur është marrë vendimi nga Rex Tillerson për Adriatik Llallën, kam menduar se ai është vendim jo i pabazuar, por deklaratat e sotme të ambasadorit unë i konsideroj të gabuara.