Shkreli: Do ketë lehtësi për përdoruesit e shpeshtë
Tarifa për kalimin në Rrugën e Kombit për përdoruesit e shpeshtë dhe transportin publik pritet të jetë më e ulët. Ishte ky mesazhi që iu përcolli dje zv. ministri i Transporteve, Artan Shkreli, banorëve të zonës të Tropojës. Gjatë bashkëbisedimit me banorët e kësaj zone, zv. ministri Shkreli u njoh nga afër me pretendimet e tyre për tarifën e kalimit në Rrugën e Kombit dhe propozimet e tyre për të zbutur efektin mbi komunitetin lokal. Zv. ministri Shkreli deklaroi se për përdoruesit e shpeshtë do të ketë lehtësira. “Përsa i përket atyre që nuk përdorin makinat private dhe këtu fus njerëz që janë shumë në nevojë, fus studentë, njerëz që marrin transportin publik apo të moshuarit, natyrisht kjo do të ketë një trajtim të veçantë dhe preferencial. Gjithashtu, për përdoruesit e shpeshtë do të shohim një formulë që këta njerëz, siç foli dhe zotëria që shkon disa herë në muaj në Tiranë apo që shkojnë shumë herë në vit se nuk është e thënë të shkojnë patjetër dy herë në javë, të krijojmë një fashë për këta njerëz dhe mënyrën si identifikohen ata te pjesa ku paguajnë. Do të bëjmë dhe disa matje të tjera për të kuptuar se çfarë do të thotë përdorues i shpeshtë i rrugës”, u shpreh Shkreli. Gjatë vizitës në Tropojë, zv. ministri Shkreli u prit në një takim edhe nga kryebashkiaku Besnik Dushaj, me të cilin diskutoi mbi çështjen e infrastrukturës dhe procesin e negociatave mes qeverisë dhe kompanisë koncesionare, referuar mirëmbajtjes së Rrugës së Kombit. “Besoj se do të arrijmë në një formulë të atillë që nga njëra anë tarifa të paguhet, por nga ana tjetër, njerëzit, pra shtresat apo grupet e ndryshme të cilët nuk e kanë këtë mundësi, të lehtësohen në këtë pagesë”, nënvizoi Shkreli.