Nisin proceset gjyqësore për Shkëlqim Selamin dhe Elvis Rroshin

Ish- deputeti i LSI- së dhe PS- së, Shkëlqim Selami dhe ish- kreu i Bashkisë së Kavajës, Elvis Rroshi, do të përballen me procese gjyqësore për deklaratat e rreme që kanë dhënë në formularët e dekriminalizimit. Ish- deputeti Selami, ishte ditën e djeshme në Gjykatën e Tiranës për seancën e parë, ku sipas Kodit të ri të Procedurës Penale ishte prezantimi i palëve. Por seanca gjyqësore u shty për një datë tjetër. Ndërsa në lidhje me Elvis Rroshin, seanca e parë do të jetë më 16 prill në Gjykatën e Tiranës. Selami akuzohet për falsifikim të vulave, stampave dhe formularëve” nga Prokuroria e Tiranës. Kjo e fundit ka mbyllur hetimet për ish- deputetin, i cili ka fshehur një masë sigurie nga Gjykata e Brindizit në formularët e vetëdeklarimit në kuadër të dekriminalizimit. Sipas dosjes së Prokurorisë së Tiranës, ndaj Selamit ka pasur një masë sigurie “arrest me burg” nga Gjykata e Brindizit në vitin 1994 për pjesëmarrje në organizatë kriminale. Por kjo masë është shuar kur ish- deputeti u arrestua në Itali në vitin 2006 dhe në vitin 2007 Gjykata italiane vendosi shuarjen e veprës penale për shkak të parashkrimit. Mirëpo, Selami, edhe pse ka pasur dijeni për hetimet ndaj tij dhe për masën, e ka fshehur atë duke mos e deklaruar në formularin që ka plotësuar, pasi është zgjedhur deputet i Kuvendit të Shqipërisë. Kujtojmë se Shkëlqim Selamit iu hoq mandati pikërisht nga KQZ, në kuadër të dekriminalizimit. Edhe rasti i Elvis Rroshit është i ngjashëm. Sipas Prokurorisë, është vërtetuar se Rroshi ka fshehur dënimin në shtetin italian dhe ka përdorur disa emra të shkuarën, pa i deklaruar në formularin e dekriminalizimit. Për këtë arsye, ai ka konsumuar veprën penale të “falsifikimit të vulave, stampave dhe formularëve”. Pasi ka mbyllur he- timet, prokurori i Tiranës, Enklid Gjini, ka dërguar çështjen në Gjykatën e Tiranës. Gjithashtu, në njoftimin e Prokurorisë së Tiranës, shpërndarë për mediat ditën e djeshme, thuhet se në vitin 2015, DEA amerikane ka informuar autoritetet zvicerane në lidhje me një shtetas nën hetim, që identifikohej me emrin Enver Rroshi. Ky ishte nën hetim për trafik droge. Nuk dihet nëse është i njëjti person, por po vazhdojnë verifikimet në këtë drejtim. Nga ana e tij, Rroshi ka pretenduar gjithnjë që nuk ka qenë në dijeni të dënimit që sipas tij, e ka marrë në moshën 16- vjeçare.