Specializimet në Mjekësi, ja datat e rregullat e testimit
Qendra e Shërbimeve Arsimore do të jetë ambienti ku do të tes- tohen edhe kandidatët e specializimeve në Mjekësi. Një ditë më parë është shpallur dhe kalendari i detajuar me oraret dhe përbërjet e shtatë grupeve që do të testohen brenda tri ditësh, nga dita e shtunë deri të hënën. Kjo është faza e tretë dhe e fundit, përcaktuese për përzgjedhjen e specializantëve të rinj të Mjekësisë. Vlerësimi final do të përllogaritet nga komisioni i vlerësimit në bazë të tre treguesve: notës mesatare, intervistës me gojë dhe testimit, i cili ka edhe peshën kryesore. Në përfundim të testimit, brenda dy ditësh, kandidatët do të mund të zgjedhin programin e specializimit afatgjatë, sipas kuotave të miratuara nga Ministria e Shëndetësisë. RREGULLORJA
E TESTIMIT Provimet e specializimeve afatgjata të ciklit të tretë në fushën e Mjekësisë do të fillojnë nesër e parashikohet të zgjasin për tri ditë në tri orare të përcaktuara: 09: 00; 13: 00 e 17: 00. 323 kandidatët do t’i rikthehen për të dytën herë ambienteve të QSHA- së, dikur në provimin për licencim e tashmë për të fituar specializimin. Si vendndodhja, edhe rregullorja nuk kanë ndryshuar. Ata duhet të paraqiten së paku gjysmë ore përpara orës së caktuar të provimit. Në faqen zyrtare, secili mund të gjejë lehtësisht emrin e tij bashkë me grupin dhe orën e testimit. Po ashtu, ai duhet të ketë me vete kartën e identitetit dhe një kopje të saj, si kusht për të qenë pjesë e provimit. Ndërsa gjatë provimit, kandidatët duhet të kenë parasysh disa rregulla, të cilat në rast se shkelen, i penalizojnë nga gara për të fituar specialitetin që dëshirojnë. Në ambientet e testimit të informatizuar ndalohet si komunikimi, ashtu dhe mbajtja apo përdorimi i celularëve apo çdo lloj mjeti komunikimi, si dhe konsumi i ushqimeve apo duhanit.