Gjukanoviç: Nëse fitoj Presidencën, do t’i përmbahem paktit për kufirin
Millo Gjukanoviç, kandidat për President të Malit të Zi në zgjedhjet e 15 prillit, pohoi se Podgorica do ta respektojë deklaratën Thaçi- Vujanoviç për korrigjimin e gabimeve që Kryeministri Haradinaj insiston se janë bërë kur është shënuar kufiri. Gjukanoviç ka folur në një intervistë ekskluzive për “Gazeta Express”. Politikani kontrovers, i njohur ndër të tjera edhe për pasurinë e tij të madhe, tha se “Do të respektojmë gjithçka që parashihet me marrëveshje, edhe nevojën që të përmirësojmë gabimet eventuale nëse konfirmohet se ka të tilla”. Sa për raportet me Presidentin aktual të Kosovës, Hashim Thaçi, Gjukanoviç tha: “Për një kohë të gjatë kemi ndërtuar raporte mjaft të hapura të mirëbesimit dhe respektit reciprok. Mund të them se kemi raporte miqësore”. Kreu i DPS- së në Mal të Zi foli edhe për vendimin e vitit 2008, kur vendi i tij vendosi ta njohë Kosovën. Gjukanoviç kujton se: “Ai vendim nuk ishte i lehtë. Por, ne vlerësuam se kjo është në interes të përbashkët, jo vetëm për Malin e Zi dhe Kosovën, por për rajonin në tërësi, përfshirë natyrisht edhe Serbinë. Pavarësisht se e kuptojmë dimensionin historik dhe emocionin e veçantë të Beogradit ndaj çështjes së Kosovës”. Gjukanoviç u shpreh i bindur se kandidati për President në Mal të Zi, i cili ka thënë se do të anulojë njohjen e Kosovës, nuk ka për të fituar. Gjukanoviç tha se e llogarit përkrahjen e shqiptarëve në votim, të cilët në të gjitha fazat vendimtare të historisë më të re të Malit të Zi kanë pasur një rol tejet pozitiv. “Unë s’kam ndjenja të veçanta për asnjë popull në Mal të Zi, sepse Mali i Zi është shtet i përbashkët edhe i malazezëve edhe i serbëve, edhe i shqiptarëve dhe boshnjakëve, edhe i myslimanëve dhe kroatëve, i të gjithë qytetarëve të tij. Premtimi im për të gjithë është përmbajtur në sloganin e fushatës – për stabilitet dhe përparim të Malit të Zi”, tha kandidati presidencial, Gjukanoviç.