Mogerini dhe Hahn dhanë lajmin e mirë: Ka rezultate me Vetingun
Komisioni Europian ka rekomanduar dje çeljen e negociatave të anëtarësimit për Shqipërinë dhe Maqedoninë, duke vlerësuar si pozitiv progresin e arritur në reformat kyçe. Në konferencën për mediat, përfaqësuesja e lartë të BE- së, Frederika Mogerini, deklaroi dje se raporti është hartuar mbi bazën e meritës të secilit vend dhe se ato duhet të vazhdojnë të ruajnë ritmin pozitiv. “Komisioni rekomandon që Këshilli të vendosë që të hapë negociatat për anëtarësim me Shqipërinë dhe me ish- Republikën Jugosllave të Maqedonisë. Po kështu, po punojmë për një opinion për kërkesën e Bosnje- Hercegovinës dhe gjithashtu me autoritetet kosovare po punojmë për një progres të mëtejshëm në bazë të marrëveshjes stabilizim- asociimit që kemi me ta. Ky është një proces i gjatë. Unë shpresoj dhe besoj se progresi në rrugën e reformave duhet të vazhdojë. Kjo nuk duhet të ndodhë sepse e duam ne, por sepse e duan qytetarët e vendeve të Ballkanit”, ka thënë dje Mogerini. Nga ana tjetër, komisionari për zgjerimin në BE, Johanes Hahn, vlerësoi rolin e Shqipërisë dhe u shpreh se vazhdimësia pozitive e Shqipërisë drejt anëtarësimit do të varet nga zbatimi i suksesshëm i Reformës në Drejtësi dhe nga avancimi në 5 prioritetet kryesore. “Duhet shtuar zbatimi i reformave kur flitet për Shqipërinë dhe e kam fjalën për 5 prioritetet kyçe që kanë të bëjnë me administratën publike, luftën kundër krimit të organizuar dhe korrupsionit, reformën në gjyqësor si dhe mbrojtjen e minoriteteve. Sa i përket reformës në gjyqësor, ne kemi parë rezultate konkrete në procesin e vetting- ut për gjyqtarët dhe prokurorët. Jemi në fillim të këtij procesi, por ka shenja që e justifikojnë rekomandimin tonë. Parimi është i thjeshtë. Nëse vendet japin rezultate, atëherë dhe ne duhet të japim rezultate”, ka thënë ai.