Meta: Çelja e negociatave një akt inkurajues, të reflektojmë për sfidat
Presidenti i Republikës, Ilir Meta, e cilësoi rekomandimin e Komisionit Europian për çeljen e negociatave, një akt inkurajues për të ardhmen europiane të vendit. Kreu i shtetit priti në Presidencë, Ambasadoren e Delegacionit të BE- së në Tiranë, Romana Vlahutin, e cila i dorëzoi edhe raportin e progresit për Shqipërinë nga Komisioni Europian. Presidenti e vlerësoi Komisionin si një mik të çmuar e të pakursyer të vendeve kandidate, duke u vetëdëshmuar si një forcë e madhe tërheqëse drejt zgjerimit të mëtejshëm të BE- së. “Mirëpresim rekomandimin e Komisionit Europian për çeljen e negociatave të anëtarësimit me Shqipërinë, duke e cilësuar një akt inkurajues, të shumëpritur dhe strategjik për të ardhmen europiane të vendit. Shpreh kënaqësinë që ky raport dhe posaçërisht rekomandimi për çeljen e negociatave i gjen të gjithë aktorët politikë, institucionalë dhe qytetarët shqiptarë të bashkuar në dëshirën për të përparuar sa më shumë dhe sa më parë drejt BE- së, pa mëdyshje”, deklaroi kreu i shtetit. Duke e konsideruar raportin e progresit për Shqipërinë në harmoni të plotë me strategjinë e zgjerimit, që synonte një perspektivë të besueshme dhe angazhim të thelluar të BE- së në Ballkanin Perëndimor, Presidenti Meta ka theksuar rëndësinë që ka miratimi i kësaj qasjeje dhe rekomandimit të Komisionit nga Këshilli Europian, për të nisur etapën e re të procesit të negociatave të anëtarësimit. Kreu i shtetit shprehu besimin se ky moment do t’i shërbejë një reflektimi të thellë dhe serioz për përballjen e sfidave të mëdha që kemi përpara, për ta bërë Shqipërinë një vend europian më shpresëdhënës. Ambasadorja e Delegacionit të BE- së në Tiranë, Romana Vlahutin, zhvilloi takime me Kryeministrin Rama dhe kreun e Kuvendit, Gramoz Ruçi, pas rekomandimit të Komisionit Europian për çeljen e negociatave me BE për Shqipërinë.