Basha: Nuk është momenti për festë, disa vende skeptike
“Vende kryesore në BE kërkojnë arritje dhe prova të vërteta në luftën kundër krimit dhe korrupsionit”
Kryetari i opozitës, Lulzim Basha, e sheh hapjen e negociatave me Bashkimin Europian si një mjet shtesë presioni për të monitoruar luftën kundër krimit të organizuar dhe korrupsionit në vend.
Por, pas takimeve të zhvilluara me deputetët e grupit më të madh parlamentar gjerman CDU/ CSU, kreu i PD- së thekson se nuk është koha që vendi të festojë, por të punojë me vende si Gjermania, të cilat janë skeptike për Shqipërinë. “Sot nuk është momenti për të festuar, por për të punuar. Disa nga vendet kryesore europiane janë skeptike për Shqipërinë dhe kërkojnë arritje dhe prova të vërteta, veçanërisht në shtetin e së drejtës, luftën kundër krimit dhe korrupsionit. Një nga këto vende është Gjermania, Parlamenti i së cilës është ende i pavendosur për qëndrimin ndaj Shqipërisë. Sot kam zhvilluar takime të shumta me parlamentarë dhe funksionarë të qeverisë gjermane, në të cilat kam argumentuar pro hapjes së negociatave si një hap i rëndësishëm në vetvete për të forcuar demokracinë, shtetin ligjor dhe luftën kundër krimit dhe korrupsionit”, deklaroi Basha. Pas zhvillimit të një seance dëgjimore me anëtarë të Komisionit për Çështjet Europiane dhe të Politikës së Jashtme, me qëllim bindjen e grupit më të madh parlamentar gjerman CDU/ CSU për nisjen e negociatave të vendit me BE, Basha foli për një skepticizëm për dhënien e këtij shansi për Shqipërinë. “Bindja e grupit më të madh parlamentar gjerman CDU/ CSU është një detyrë të vështirë, sepse ky grupim është skeptik për zgjerimin dhe kritik për hapjen e negociatave dhe ka si shqetësim kryesor luftën kundër drogës, luftën kundër korrupsionit, Reformën në Drejtësi. Hapja e negociatave është edhe si një mjet shtesë presioni dhe monitorimi për të intensifikuar luftën kundër krimit të organizuar dhe korrupsionit, zbatimin e vërtetë të Reformës në Drejtësi, të pakapur politikisht, por edhe për çështje të tjera siç është Reforma e Administratës Publike dhe Reforma Zgjedhore. Shpresoj që këto takime të kenë kontribuar sadopak që qeveria gjermane dhe Bundestagu të mbështesë dhe votojë pro hapjes së negociatave, duke i hapur rrugën votës pro të Gjermanisë në qershor. Sikurse shpresoj, që edhe Franca dhe Holanda do të përqafojnë aspiratën e madhe të shqiptarëve për të qenë pjesë e BE- së”, tha Basha.