Struktura e re e Policisë, “Shqiponja” në çdo Drejtori Vendore
Policia e Shtetit ka përgatitur dhe së shpejti pritet që të implementojë strukturën e re në 11 Drejtoritë Vendore të Policisë. Kjo strukturë rikthen postin e zv. drejtorit të Rendit dhe Sigurisë Publike, që u hoq në fund të vitit 2013 dhe deri tani ekzistonte vetëm në Drejtorinë e Policisë së Tiranës. Struktura e re parashikon përgjysmim i numrit të sektorëve, nga 8 që janë sot, në 4. Bëhet fjalë për Sektorin e Sigurisë Publike, që ka në varësi Seksionin e Krimeve, të Rendit Publik dhe “Shqiponja”; Sektori i Policisë Rrugore, që ka në barosi Seksionin e Administrimit dhe Dokumentimin / AIS e Seksionin e Trafikut Urban e Interurban; Sektori për Hetimin e Krimeve, që ka në varësi Seksionin për Krimin Ekonomik dhe Financiar, Seksionin për Krimet e Rënda dhe Seksionin e Trafiqeve; Sektori i Shërbimeve Policore të Specializuara, që ka në varësi Seksionin e Teknologjisë dhe Informacionit e Përgjimet, Seksionin e Policisë Shkencore dhe Seksionin Operacional. Struktura e re parashikon që Njësia “Shqiponja”, që më parë ishte vetëm në Policinë e Tiranës, tashmë do të jetë në të gjitha Drejtoritë Vendore të Policisë. Ndryshimet strukturore do të prekin më pak Policinë e Tiranës, për shkak të rëndësisë që ka sa i takon dinamikës dhe numrit të popullsisë. Por tashmë me hetimin e vrasjeve dhe krimeve kundër jetës do angazhohen edhe Komisariatet përveç Seksionit të Krimeve në çdo drejtori, ashtu siç ishte deri në vitin 2007. Nga ana tjetër, ministri i Brendshëm, Fatmir Xhafaj, shoqëruar nga drejtori i Përgjithshëm i Policisë së Shtetit, Ardi Veliu dhe drejtori i Policisë së Lezhës, Ferdinand Mara, inauguruan dje Zyrën e Shërbimit për Qytetarin në Komisariatin e Policisë Rrëshen. Në këtë Komisariat, mbi 30 shtetas çdo ditë i drejtohen kësaj zyre për problematika të ndryshme. “Më vjen shumë mirë që është rikonstruktuar gjithë ky ambient i përshtatshëm, që të vijnë njerëz dhe të gjejnë një ambient të tillë, që edhe nga pikëpamja funksionale të jetë një gjë sa më e mirë, sa më e përshtatshme”, u shpreh Xhafaj.