Trafikuan 130 kg kokainë nga Kolumbia, arrestohen 4 shqiptarë
Policia italiane në bashkëpunim me Policinë shqiptare realizoi dje një operacion, duke vënë në pranga 7 persona, mes të cilëve 4 shqiptarë. Të arrestuarit ishin pjesë e një grupi kriminal në fushën e trafikimit të narkotikëve, kryesisht kokainë që vinte nga vendet e Amerikës së Jugut, Kolumbia e Ekuadori, në drejtim të vendeve të BE- së. Ky grup dyshohet se ka trafikuar të paktën 130 kg kokainë dhe po hetohet edhe për pastrim parash. Operacioni i koduar “Affari di famiglia” u organizua dhe finalizua falë bashkëpunimit mes strukturave të hetimit të narkotikëve të dy policive, italiane dhe shqiptare, në veçanti me grupin operativ të Guardia di Finanza të Romës. Në orët e para të mëngjesit të djeshëm, Policia e Shtetit, në bashkëpunim dhe koordinim me forcat Policore italiane të shërbimit Antidrogë, kanë ekzekutuar njëkohësisht në Itali dhe Shqipëri urdhërarrestet ndërkombëtare të lëshuara nga Prokuroria e Romës në kuadër të operacionit për veprat penale të “Trafikimit të narkotikëve” dhe “Pastrimit të parave”. Në Shqipëri u arrestuan 2 shtetas shqiptarë, të dyshuar si pjesë e grupit kriminal. Të arrestuarit janë Edmir Hatija, 41 vjeç dhe Elidon Shpërdheja, 38 vjeç, të dy banues në Fier. Ndërkohë, në Itali janë arrestuar 5 sh- tetas, 3 italianë dhe 2 shqiptarët, Florian Prendi, 31 vjeç e Aleks Boçi, 38 vjeç. Policia tha se droga e llojit kokainë vinte nga Holanda dhe Belgjika. Po vijon puna në bashkëpunim me shërbimin ndërkombëtar të dy organizatave policore dhe policive kriminale për sh- katërrimin e grupit kriminal dhe sekuestrimin e aseteve. Urdhërarrestet u ekzekutuan në orët e para të mëngjesit në kuadër të operacionit “Affari di famiglia”, ndaj një grupi kriminal, i cili trafikonte kokainë në Belgjikë, Itali dhe Shqipëri. Mediat italiane bëjnë të ditur se droga sigurohej në Amerikën e Jugut dhe më pas shitej në tregun e Romës. Hetimi mësohet se ka filluar pas mbarimit të operacionit “La Romaia” më 10 tetor, i cili çoi në arrestimin e 18 personave, të cilët kishin lidhje me organizatën mafioze, “Ndragheta”.