Autobusët, Veliaj- operatorëve: Rinovoni flotën ose do ta bëjmë ne
Nëse operatorët privatë të transportit publik nuk rinovojnë flotën urbane duke i zëvendësuar autobusët me ata elektrikë, do ta bëjë bashkia. Ky është zotimi i kryetarit të bashkisë, Erion Veliaj, pas takimit me homologun e Veronës, Federico Sboarina. “Po studiojmë mënyrën sesi edhe me ndriçimin e qytetit, edhe me transportin publik, të ecim përpara. Ashtu siç kam premtuar, nëse privatët nuk do modernizojnë flotën e mjeteve, duke i kthyer ato në elektrike, bashkëpunimi me Veronën është prova konkrete që kemi nisur për të zëvendësuar shumë prej linjave private. Ashtu siç bëjmë më mirë pastrimin e qytetit, ashtu do të bëjmë edhe transportin publik”. Tashmë është bërë gati marrëveshja, e cila do të konkretizohet shumë shpejt, bashkë me atë për ndriçimin. Këto kanë gjetur mbështetjen e kryebashkiakut të Veronës, i cili u shpreh entuziast për raportin e krijuar. “Në Tiranë pata një mikpritje të pabesueshme. Munda të shoh për herë të parë një qytet me një energji të madhe, që po rritet vërtet me shpejtësinë e dritës. U takuam edhe me Presidentin e rajonit të Venetos, Luza Zaia, me të cilin dis- kutuam projekte të rëndësishme. Gjëja më thelbësore është se u krijua një raport i vërtetë mes dy kryetarëve të bashkive, të cilët e duan tokën e tyre dhe kështu mund të ndërtojnë së bashku diçka të rëndësishme”, nënvizoi Sboarina. Gjatë vizitës në Itali, kryebashkiaku i Tiranës vizitoi edhe panairin “VinI- taly”, i cili zhvillohet çdo vit në Fiera di Verona dhe është një vend i rëndësishëm takimi midis prodhuesve dhe blerësve. Veliaj u shpreh se ky panair është një mundësi fantastike për të inkurajuar bizneset dhe sipërmarrjet shqiptare në zonat rurale, për t’u përfshirë në prodhimin e verës.