Grabitet filiali i Postës në Laprakë, plagoset punonjësja
Autori me maskë, nën kërcënimin e thikës mori 30 mijë lekë
Një filial i Postës Shqiptare u grabit pasditen e djeshme, në zonën e Laprakës, në Tiranë, nga një person ende i paidentifikuar.
Grabitësi i maskuar, nën kërcënimin e thikës, ka arritur të marrë 30 mijë lekë të rinj dhe është larguar nga vendi i ngjarjes. Burimet thanë se njëra nga punonjëset e Postës Nr. 7, gjatë tentativës për të lajmëruar Policinë, ka bërë rezistencë duke u përleshur me autorin. Gjatë këtij momenti, ajo është plagosur lehtë me thikë në dorë, por pa probleme serioze. Ndërsa autori ka arritur të realizojë qëllimin e tij, duke marrë paratë dhe është “zhdukur” pa lënë gjurmë. Ngjarja ndodhi rreth orës 15: 50, në rrugën “Dritan Hoxha”, te blloku i pallateve “Gintash”. Menjëherë pas sinjalizimit për ngjarjen, aty shkuan shërbimet e Komisariatit nr. 3 e më pas edhe oficerët e Krimeve Kundër Pronës dhe ekspertët kriminalistë. Burimet thanë se autori i dyshuar i ngjarjes mund të jetë rreth 25- 27 vjeç, me trup mesatar, por duket qenë se ishte i maskuar, dëshmitarët nuk kanë mundur ta identifikojnë. Nga të dhënat e deritanishme dyshohet se ai ka vepruar i vetëm, duke u larguar në këmbë mes për mes rrugicave të zonës.
GRABITJA Policia e Tiranës njoftoi dje zyrtarisht se, rreth orës 15: 50, në rrugën “Dritan Hoxha”, te blloku “Gintash”, në Postën Nr. 7, një person ende i paidentifikuar dyshohet se i kanë marrë nën kërcënimin e një thike, rreth 30 mijë lekë, punonjëses së sportelit. Në vendin e ngjarjes është formuar grupi hetimor, për sqarimin e rrethanave të ngjarjes dhe identifikimin e kapjen e autorit. Policia, në njoftimin zyrtar, nuk u shpreh për ndonjë person të plagosur gjatë grabitjes, megjithatë burimet thanë se punonjësja e sportelit është dëmtuar lehtë nga thika e autorit, gjatë përleshjes me të. Menjëherë pas ngjarjes, Policia ngriti pika kontrolli në disa rrugë, ndërsa vijoi me krehjen e zonës, duke shoqëruar disa persona si të dyshuar e që mund të kishin dijeni për ngjarjen. Nga ana tjetër u sekuestruan edhe disa pamje filmike, që mund të ndihmojnë në verifikimin e lëvizjeve të autorit e në identifikimin e tij.