Putin, Merkelit: Sulmet e Perëndimit dëmtuan paqen
Rusia “mbështet vizitën e inspektorëve ndërkombëtarë”
Presidenti rus Vladimir Putin i ka thënë Kancelares gjermane Angela Merkel se Shtetet e Bashkuara, Britania e Madhe dhe Franca kanë shkelur të drejtën ndërkombëtare dhe kanë dëmtuar procesin e paqes në Siri, duke nisur sulme ajrore ndaj objektivave në Damask.
Sipas Kremlinit, në një bisedë telefonike mes Putin dhe Merkel, u tha se perspektiva për bisedimet e paqes për Sirinë u dëmtua nga sulmet ajrore, të cilat u kryen si hakmarrje për sulmin e raportuar të gazit helmues në një periferi të Damaskut të kontrolluar nga rebelët. Një mision për zbulimin e fakteve nga Organizata për Ndalimin e Armëve Kimike pritet të vizitojë vendin e sulmit të dyshuar me gaz. Rusia deklaroi se e mbështet fuqishëm vizitën e inspektorëve ndërkombëtarë në vendin e një sulmi të dyshuar kimik në Siri. Zëdhënësja e Ministrisë së Jashtme, Maria Zakharova, i hodhi poshtë akuzat se Rusia po përpiqej të pengonte misionin e ekspertëve të Organizatës për Ndalimin e Armëve Kimike. Sipas aktivistëve sirianë, dhjetëra vetë u vranë në sulmin kimik në Douma më 7 prill, për të cilin ata fajësuan forcat qe- veritare. Kjo shkaktoi sulmin me raketa të SHBA- së, Britanisë dhe Francës ndaj objektivave të armëve të qeverisë siriane. Rusia ka mohuar se ka ndodhur ndonjë sulm kimik dhe Moska akuzoi rebelët sirianë për fabrikimin e sulmit me ndihmën e Britanisë, por Londra e ka hedhur poshtë këtë akuzë. Ush- tria ruse tha të martën se kishte gjetur depozita të armëve kimike rebele në Douma, duke përfshirë edhe prekursorët e gazit të klorit dhe të mustardës. Televizioni shtetëror sirian thotë se ekipi i inspektorëve ndërkombëtarë hyri në Douma të martën, pasi u vonuan “për çështje sigurie” nga autoritetet siriane dhe ruse. Sekretari i Përgjithshëm i OKB- së, Antonio Guterres, i ka bërë thirrje qeverisë siriane që të sigurojë punën pa kufizime të inspektorëve ndërkombëtare të armëve kimike. Guterres tha se është detyrim i qeverisë siriane që të sigurojë të gjitha kushtet për të punuar pa asnjë kufizim.