Raporti për arrestimet e kuksianëve: Natën dhe të paligjshme
Zbardhet raporti i plotë i Avokatit të Popullit, si e shkeli ligjin Policia dhe Prokuroria: Urdhrat pa arsyetim, jashtë afateve ligjore
Avokati i Popullit ka publikuar ditën e djeshme një raport me të gjitha shkeljet që ky institucion ka vërejtur për punën e Policisë, Prokurorisë dhe Gjykatës në arrestimin, procedimin dhe vendosjen e masave të sigurive për 23 protestuesit e Rrugës së Kombit. Kështu, sipas Avokatit të Popullit, shkeljet janë konstatuar që para nisjes së protestës, kur Këshilli Bashkiak i Kukësit ka kërkuar leje për zhvillimin e tubimit në Komisariatin e Policisë së Kukësit. Mirëpo, shefi i këtij Komisariati, sipas Avokatit të Popullit, i ka kthyer përgjigjet për përmbushjet e kërkesave jashtë afateve kohore që përcakton ligji. Gjithashtu, Avokati i Popullit konstaton mangësi dhe shkelje në punën e Prokurorisë në lidhje me nxjerrjen e urdhërndalimeve për protestuesit. Këto urdhërndalime janë nxjerrë nga Prokuroria e Kukësit pa pasur ndonjë kallëzim dhe pa u dër- guar më parë në Gjykatë për vleftësim. Nga ana e zbatimit të urdhërndalimeve, efektivët e Policisë i kanë ekzekutuar ato në orët e vona të natës dhe pa pasur kopje të tyre për t’ua komunikuar protestuesve. Raporti thotë se janë vërejtur shkelje në mbajtjen e procesverbaleve nga OPGJ- të dhe se protestuesve u është privuar liria më shumë se sa parashikon ligji. Kërkesa e Prokurorisë për vlerësimin e masave të sigurisë në Gjykatë është dërguar jashtë afateve kohore. Raporti thotë se Prokuroria nuk ka vendosur arsyetime në kërkesë për masat e sigurive të protestuesve. Rezerva ka pasur edhe për Gjykatën që ka vlerësuar masat, që nga vijimi i seancës me dyer të mbyllura dhe deri te koha e zhvillimit të saj. Sipas Avokatit të Popullit, seanca zgjati 3 orë dhe pjesën më të madhe të kohës e zuri kërkesa e Prokurorisë dhe leximi i vendimit. Ndërsa 23 të arrestuarit patën vetëm 5 minuta kohë të mbroheshin në total.