Folklori shqiptar, Ansambli i Këngës, dy ditë koncert në Bruksel
Sot e nesër, në zemër të Europës do të këndohet shqip. Shqipëria do të prezantojë identitetin e saj kulturor në Bruksel, në sallën BOZAR.
Prej datës 19 - 22 prill në Bruksel po zhvillohet Festivali Ndërkombëtar Kulturor “Balkan Trafik”, ku këtë vit, me mbështetjen e Ministrisë së Kulturës, Shqipëria do të përfaqësohet me Ansamblin Kombëtar të Këngëve dhe Valleve Popullore ( AKKVP).
“Detyra e promovimit të një imazhi të favorshëm jashtë vendit i takon diplomacisë kulturore. Roli i kulturës në përmirësimin apo promovimin e imazhit të vendit është i rëndësishëm. Kemi vite që Shqipëria eksporton kulturë me cilësi të lartë”, është shprehur ministrja e Kulturës, Mirela Kumbaro.
Me një formacion prej 17 artistësh, solistë, grupi i valleve, kompleksi vokal dhe orkestra popullore, me grupin polifonik së bashku me zërin e magjishëm Hysni ( NIKO) Zelës, të pranishmit do të mund të udhëtojnë përmes këngës, valles dhe folklorit shqiptar, përfaqësuar nga Ansambli Kombëtar.
Programi do të përfshijë vallet më të spikatura të zonave të ndryshme, këngët polifonike deri te formacionet orkestrale në formën e kabasë apo meloditë e pavdekshme të këngës së kultivuar.
Përfaqësimi i trupës së Ansamblit Kombëtar në këtë edicion i dedikohet polifonisë shqiptare si trashëgimi e UNESCOS- s, në kuadër të 60vjetorit të anëtarësimit të Shqipërisë në këtë organizatë.
Pjesëmarrja në këtë festival ndërkombëtar organizohet në bashkëpunim me Ministrinë për Europën dhe Punët e Jashtme si dhe përfaqësinë tonë diplomatike në Bruksel.