Rama e Basha përplasen për deputetin e Bundestagut
Basha: Aksion i ulët propagandistik i Ramës, do shtojë radhët e pesimistëve për negociatat
Kryetari i opozitës, Lulzim Basha, akuzon Kryeministrin Rama se përmes mediave të kontrolluara prej tij ka ndërmarrë një fushatë shpifjesh ndaj deputetit gjerman të CDU- së, Gunther Krichbaum.
Sipas Bashës, të gjithë sulmet ndaj kryetarit të Komisionit të Çështjeve Europiane të Bundestagut kanë ardhur menjëherë pasi ky i fundit deklaroi se për çeljen e negociatave, Gjermania do të kërkojë rezultate konkrete nga qeveria në luftën kundër krimit të organizuar dhe korrupsionit. “Dënoj fushatën e akuzave të pabaza dhe shpifjeve të ulëta kundër Gunther Krichbaum, kryetarit të Komisionit të Çështjeve Europiane të Bundestagut, i cili është vënë nën shënjestrën e një fushate të turpshme dhe e papranueshme. Kjo fushatë e pistë, e frymëzuar nga sulmet e Kryeministrit Edi Rama në mediat e kontrolluara prej tij, kryetarit të Bashkisë së Tiranës, Erion Veliaj dhe ishministrit të Brendshëm, trafikantit ndërkombëtar të drogës, Saimir Tahiri, bie ndesh me çdo vlerë demokratike dhe europiane. Ajo dëshmon mentalitetin kriminal dhe autokratik se kritikët dhe ata që mendojnë ndryshe duhet të sulmohen personalisht dhe të denigrohen. Në vend që të ballafaqohet me realitetin e vërtetë që Krichbaum e argumenton në mënyrë bindëse, në vend që të reflektojë për kritikat e drejta të Krichbaum, Edi Rama ka zgjedhur të prodhojë një fushatë shpifjesh dhe lajmesh false, fake news, kundër kryetarit të Komisionit të Çështjeve të Bash- kimit Europian në Bundestag”, deklaroi Basha.
NEGOCIATAT Sipas kreut të PD- së, sulmi ndaj deputetit të CDU- së është i financuar nga paratë e krimit dhe dëmton rëndë interesat e vendit në një kohë që pritet të merret një përgjigje nga Bashkimi Europian për çeljen e negociatave. “Gunther Krichbaum është një nga figurat politike më të nderuara dhe të respektuara të Europës. Mbi të gjitha, Gunther Krichbaum është një njeri që e do dhe mbështet Shqipërinë. Por ai do një Shqipëri ku të sundojë shteti i së drejtës dhe demokracia. Prandaj ai ka shprehur hapur dhe me ndershmëri mendimet dhe kritikat e tij për të ndihmuar përparimin e Shqipërisë dhe të integrimit të saj në Bashkimin Europian. Kritikat e argumentuara dhe të paanshme të Krichbaum i janë shprehur Edi Ramës dhe qeverisë shqiptare edhe nga shumë qeveri të tjera eurpiane, mbrëmë të Shteteve të Bashkuara të Amerikës dhe kryesisht hapësirës Euroatlantike. Gjëja më e ndyrë e kësaj fushate, e cila po zhvillohet prej 3 ditësh në media, është se ajo financohet nga paratë e krimit, drogës dhe korrupsionit qeveritar dhe që lidhen direkt me Edi Ramën, Saimir Tahirin dhe Erion Veliajn. Ky aksion i ulët propagandistik dëmton interesat e shqiptarëve, dëmton interesat e Shqipërisë, dëmton perspektivën e saj. Me sulmet ndaj Krichbaum, Edi Rama vetëm sa po shton radhët e deputetëve gjermanë në Bungestag që janë pesimistë për hapjen e negociatave me Shqipërinë, vota e të cilëve është e domosdoshme para se qeveria gjermane të japë vendimin e saj për Shqipërinë”, u shpreh kreu i PD- së.