Zjarr masiv në Kashar, digjet fabrika me qindra tonë plastikë
Flakët shkrumbojnë qindra tonë plastikë, tym toksik në Tiranë
Fabrika e riciklimit të mbetjeve urbane në zonën e Kasharit u përfshi nga flakët mëngjesin e djeshëm, duke rrezikuar edhe banesa e biznese të tjera pranë saj.
Zjarri masiv u përhap me shpejtësi dhe flakët shkrumbuan qindra tonë plastikë, që përhapën tym toksik në zonat përreth autostradës Tiranë – Durrës. Ngjarja ndodhi rreth orës 10: 00 të mëngjesit dhe forca të shumta zjarrfikëse luftuan me flakët për orë të tëra, derisa arritën të shuajnë zjarrin. Pas tri orësh, rreth orës 13: 00 zjarri u vendos në kontroll, ndërsa vijoi puna për shuarjen e plotë. Fabrika që kishte si qëllim riciklimin e mbetjeve urbane, jo vetëm të Tiranës, dje u kthye në ndotësen më të madhe. Reja shumë toksike që u prodhua nga djegia e plastikës, është përhapur në gjithë kryeqytetin. Mësohet se për ngjarjen kanë nisur hetimet nga ana e Policisë dhe Prokurorisë, por të dhënat e para tregojnë se masat e sigurisë nga mbrojtja kundër zjarrit në këtë fabrikë ekzistonin vetëm në letër sepse në realitet, në fabrikë nuk kishte as fikse zjarri dhe as ujë. “Ky subjekt është ndëshkuar me gjobë për mosplotësim të kushteve të sigurimit ndaj zjarrit dhe vitin e kaluar ka pasur një rast të tillë”, u shpreh Arjan Ahmetaj, shef i parandalimit, zjarrfikësja Tiranë. Në vendngjarje ishin forca të shumta policie, 20 zjarrfikëse nga Tirana dhe Durrësi, si dhe forcat e Ush- trisë që bashkëpunuan për fikjen e zjarrit plotësisht, pas vendosjes në kontroll. Institucionet nuk e vlerësuan një ndërhyrje të mundshme nga ajri, pasi mund të rrezikohej helikopteri. Për disa orësh, në të gjithë zonën u bllokua qarkullimi dhe u ndërpre edhe energjia elektrike. Mësohet se një kabinë dhe një pjesë e rr- jetit elektrik janë dëmtuar si pasojë e zjarrit. Policia tha zyrtarisht se ka nisur hetimet për zjarrin e rënë në fabrikën e riciklimeve në Kashar. Po verifikohen nëse fabrika kishte masat e duhura kundër zjarrit, por edhe po punohet për zbulimin e shkaqeve. Pritet të merren në pyetje punëtorët, pronari dhe administratori.