Eduard Kukan, optimist për hapjen e negociatave
“Shqipëria të tregojë rezultate të prekshme në luftën kundër korrupsionit dhe krimit të organizuar”
Eurodeputeti dhe anëtari i Komisionit të Punëve të Jashtme të Parlamentit Europian, Eduard Kukan, është optimist për hapjen e negociatave të Shqipërisë me Bashkimin Europian në muajin qershor.
Ai ka përshëndetur rekomandimin e Komisionit Europian për çeljen e negociatave të Shqipërisë me Bashkimin Europian. “Unë e mirëprita dhe mbështes rekomandimin e Komisionit për të hapur negociatat e pranimit me Shqipërinë. Shpresoj që së shpejti vendi do të ketë një shans për të filluar negociatat dhe për të nxitur proceset e reformave”, është shprehur Kukan. Por ai i kujton Shqipërisë se miratimi i rekomandimit të Komisionit në Këshillin Europian do të varet nga disa tregues dhe rezultate konkrete. “Shqipëria duhet të ripohojë përparimin në sundimin e ligjit dhe të vazhdojë të japë rezultate të prekshme në luftën kundër korrupsionit dhe krimit të organizuar”, deklaroi Kukan për ATSH- në. Pak ditë më parë, duke vlerësuar rekomandimin e Komisionit Europian, Eduard Kukan tha se miratimi i rekomandimit të Këshillin Europian shumë herë ka kritere politike. “Ndodh shpesh që shtetet anëtare nuk i bazojnë pozicionet e tyre në rezultatet që arrin një shtet në procesin e integrimit europian, por në çështje politike dhe bilaterale. Unë do t’i bëja thirrje Këshillit që t’i vlerësojë në mënyrë objektive rezultatet e arritura nga Shqipëria dhe Maqedonia në rrugën e tyre drejt BE- së”, tha Kukan.
MOGHERINI Më 18 Prill, Përfaqësuesja e lartë e Bashkimit Europian për Politikën e Jashtme, Federica Mogherini, gjatë vizitës së saj në Tiranë, tha se Komisioni Europian ka bërë një rekomandim të pastër dhe pa kushte për çeljen e negociatave me Shqipërinë. Por ajo e cilësoi këtë rekomandim si inkurajimin për vijimin e reformave. “Kur bëhet fjalë për perspektivën e mbledhjes së Këshillit Europian në qershor, është shumë e qartë. Sot, dje më saktësisht, Komisioni Europian u shpreh se vlerësimi që ne bëjmë dhe kjo i takon Komisionit, është se kushtet janë përmbushur dhe se Shqipëria është gati për të nisur negociatat dhe me një rekomandim qartësisht pozitiv për Këshillin që të marrë vendimin, duke presupozuar që reformat do të vazhdojnë, do të ruhen e do të thellohen. Ky pra, është një rekomandim i pakushtëzuar në terma teknike, duke presupozuar se gjërat do të vazhdojnë në mënyrën siç i kemi parë të vazhdojnë gjatë këtij viti e gjysmë, me ritmin dhe thellësinë e reformave, me fokus të posaçëm në arritjen e rezultateve konkrete”, tha Mogherini. Si- pas saj, vlerësimi i Këshillit Europian do të mbështetet në meritën e vendeve që aspirojnë të hapin negociatat, ndërsa e krahasoi periudhën pas dhënies së rekomandimit si startin e nisjes së një gare të “Formula 1”, ku makinat duhet të nxitojnë për të arritur në finish. “Më pas i takon Këshillit Europian që të mar- rë vendimin, por sërish, siç ju thashë, politika e zgjerimit mbështetet në vlerësimin e mbështetur në meritë dhe gjithashtu edhe vlerësimit teknik që i takon Komisionit dhe ne e bëmë këtë vlerësim dhe rezultati ishte pozitiv. Imazhi që kam, por që tani nuk më vjen terminologjia në anglisht, nuk e di a do të më lejoni pak italisht dhe po të donin në Shqipëri, shqipen duhet ta studioj, imazhi që kam është linja e nisjes së ‘ Formula 1’. Semaforin e kemi në dritën e gjelbër dhe fillon gara. Por kjo është shumë e rëndësishme. Këtu fillon gara”, tha Mogherini në konferencën e përbashkët për shtyp me Kryeministrin Rama.