Kapet skafi me 1 ton hashash, arrestohet skafisti nga Fieri
Sekuestrohet droga në Leçe, në kërkim trafikanti i dytë
Një skafist shqiptar, që trafikoi dje një ton kanabis, është arrestuar nga Guardia di Finanza në zonën e Leçes, ndërsa një tjetër është shpallur në kërkim.
I arrestuari është 34- vjeçari Marjo Nazëraj nga Fieri, i cili drejtonte gomonen me 1 ton kanabis, ndërsa Guardia di Finanza është vënë në kërkim të bashkëpunëtorit të tij, për të cilin nuk jepen të dhëna për shkak të sekretit hetimor. Burimet thanë se operacioni është kryer në bashkëpunim mes Policisë shqiptare dhe asaj italiane. Në operacion morën pjesë forcat e Policisë shqiptare, grupi detar i Guardia di Finanzas, të stacionuar në Durrës, dhe Zyrës Ndërlidhëse policore shqiptare. Operacioni nisi pasditen e së shtunës, kur u ndalua një gomone 7 metra e gjatë me dy motorë me 100 kuaj fuqi, në zonën e Leçes. Mësohet se dy skafistët u përpoqën të largoheshin, duke u hedhur në det afër brigjeve italiane, por njëri prej tyre, Mario Nazëraj, u arrit të arrestohej, ndërsa bashkëpunëtori i tij ka mundur të largohet dhe është shpallur në kërkim. Në një video të Guardia di Finanzas të publikuar nga mediat italiane, shihet momenti kur forcat e poli- core e marrin 34- vjeçarin Mario Nazëraj dhe e fusin në mjetin e tyre të lundrimit. Pak momente para se të hidheshin në det, dy trafikantët gjatë ndjekjes me helikopter të Frontex- it dhe nga mjetet detare, e hodhën drogën në det, por ajo u rikuperua nga Guardia di Finanza. Sipas mediave italiane, droga e sekuestruar kap vlerën e 1 milion eurove.
OPERACIONI Policia e Shtetit njoftoi dje për operacionin e përbashkët ndërkombëtar kundër trafikut të narkotikëve, gjatë të cilit u sekuestrua gomonia me rreth 1 ton kanabis dhe u arrestua njëri nga skafistët. “Falë bashkëpunimit operativ, tashmë i qëndrueshëm, mes autoriteteve te Policisë shqiptare dhe Grupit Detar të Guardia di Finanza, të stacionuar në Durrës, dhe Zyrës Ndërlidhëse policore shqiptare u koordinua dhe finalizua goditja e radhës kundër trafikimit të narkotikëve. Operacioni nisi pasditen e së shtunës dhe u ndalua një gomone në zonën e Leçes”, tha dje Policia. Nga ana tjetër, Policia tha se trafikantët, gjatë ndjekjes me he- likopter të Frontex- it dhe mjete detare, e hodhën drogën në det, por ajo u rikuperua nga Guardia di Finanza e Salentos. “Afër brigjeve italiane skafistët u përpoqën të largoheshin dhe u hodhën në det. Forcat italiane kanë arrestuar shtetasin Mario Nazëraj, 34 vjeç, nga Fieri dhe shpallur në kërkim bashkëpunëtorin e tij. Mes forcave policore prezente në dy vendet, vijon puna dhe shkëmbimi intensiv i informacioneve për hetimin e plotë të rastit. Për shkak të sekretit hetimor, nuk mund të publikohen të tjera informacione”, tha dje Policia e Shtetit.