Fondi 189 milionë USD, pronarët që kompensohen
Dokumentet që duhen dorëzuar në ATP, emrat e 3500 pronarëve
Agjencia e Pronave publikon listën e 3500 pronarëve që përfitojnë kompensim nga ndërtimet pa leje në tokat e tyre. Dokumentet që duhen dorëzuar
Nga viti 2008 qeveria ka miratuar për kompensimin e pronarëve, tokat e të cilëve janë zënë nga ndërtimet pa leje, 18,9 miliardë lekë, ose rreth 189 milionë USD.
Bëhet fjalë për 37 vendime të qeverisë, të cilët i kanë njohur të drejtën e kompensimit pronarëve për tokat e zaptuara pas vitit 1992. Gazeta zbardh sot emrat e 3500 pronarëve, në të gjithë vendin, të cilët janë njohur si pronarë të tokës, i është miratuar vlera e kompensimit dhe nuk kanë aplikuar. Në njoftimin zyrtar të Agjencisë së Pronave, këta pronarë apo përfaqësuesit e tyre ligjorë ftohen të aplikojnë dhe më pas të marrin paratë e kompensimit në llogaritë e tyre bankare. Gazeta sot, boton edhe listën me dokumentet që duhen dorëzuar në Agjenci si dhe procedurën e kompensimit. Sipas njoftimit, "APT, në varësi të të ardhurave të arkëtuara deri më sot për këtë proces nga ALUIZNI dhe fondeve të vëna në dispozicion nga buxheti i shtetit, sipas përllogaritjeve përkatëse shpërndan aktualisht 70% të vlerës së miratuar në VKM për subjektet përfituese". Sipas statistikave, nga fillimi, në vitin 2010, i procesit të shpërndarjes së fondit të kompensimit në vlerë për pronarët e pasurive të paluajtshme, pronë private që preken nga ndërtimet informale e deri më tani, në ATP janë paraqitur rreth 4,600 aplikime në të cilat përfaqësohen rreth 14,000 subjekte përfituese. "Bazuar në aplikimet e kryera në ATP deri më tani për këtë proces, rezulton se rreth 3,500 subjekte përfituese nuk janë paraqitur fare në ATP për të aplikuar me qëllim përfitimin e shpërblimit të miratuar për ta në VKM- të përkatëse. Duke qene se ky proces nuk është i kushtëzuar dhe i limituar në kohë, ATP fton të gjithë këta subjekte përfituese që të paraqiten pranë sporteleve të saj për të aplikuar me qëllim për- fitimin e kompensimit të miratuar për ta në VKM- të përkatëse", thuhet në njoftimin e ATP- së.
PROCEDURA E APLIKIMIT
Procedura e aplikimit nga subjektet përfituese është e thjeshtë. "Subjektet përfituese mund të paraqesin kërkesë individuale apo të përbashkët, për pjesën takuese në pronën që kompensohet. Nëse kërkesa paraqitet nga një pjesë e bashkëpronarëve, ajo shoqërohet nga prokura e posaçme e nënshkruar prej tyre, ku si tagër i nevojshëm të jetë edhe e drejta për të tërhequr vlerën financiare, në emër të tyre. Në rastin e kërkesave individuale të secilit bashkëpronar apo të një pjese të tyre, për çdo aplikim të kryer, paguhet tarifë shërbimi, pavarësisht se i përket të njëjtës pasuri të paluajtshme", thuhet në njoftimin e ATP- së.