Paraqiti prova të reja, KPK shtyn vendimin për Xhoxhajn
Komisioni i Pavarur i Kualifikimit njoftoi ditën e djeshme se ka vendosur të shtyjë për në datën 3 maj vendimin final për gjyqtaren e Kushtetueses, Altina Xhoxhaj. Kjo e fundit ishte në seancë dëgjimore ditën e hënë dhe KPK vërejti disa parregullsi për pasurinë e saj. Megjithatë, gjyqtarja Xhoxhaj ka këmbëngulur se është e pastër dhe se llogaritjet e KPK- së për pasurinë e saj janë bërë apriori. Ajo, ditën e djeshme, ka paraqitur dokumente shtesë për pasurinë dhe likuiditetet e saj. Në hetimin e pasurisë së gjyqtares përfshiheshin një apartament 101 metra katrorë në rrugën “Reshit Petrela” në Tiranë, i cili rezulton se është blerë në vitin 2005 për 61 mijë euro; një truall dhe një apartament 2+ 1 me verandë në Gjirin e Lalzit; kursimet e gjyqtares dhe të bashkëjetuesit te saj, në vlerat 6.3 milionë lekë, 61 mijë dollarë dhe 15 mijë euro. Sipas KPK- së, në lidhje me apartamentin në Tiranë, ka mospërputhje mes deklaratave periodike dhe deklaratës në kuadër të vetingut, duke sjellë mosjustifikimin e 4.8 milionë lekëve. Ndërsa për apartamentin në Gjirin e Lalzit, KPK konstaton se ka pasur një mungesë të ardhurash në vlerën e 450 mijë lekëve. Gjithashtu, në lidhje me truallin përreth apartamentit, sipas KPK- së, gjyqtarja Xhoxhaj ka përfituar 100 metra katrorë më shumë se sa i takon. Probleme, sipas KPK- së, kanë edhe kursimet e gjyqtares dhe të bashkëjetuesit të saj. Kështu, kursimet prej 6.3 milionë lekësh dhe 61 mijë dollarë e 15 mijë euro të bashkëjetuesit, janë të pajustifikueshme dhe përtej limitit ligjor të mbajtjes së sasive të parave të thata. Në planin e aftësive profesionale, sipas KPK- së, ka pasur raste të arsyetimeve me vonesë të vendimeve gjyqësore për gjyqtaren.