Meta: Belishova, emblema kryesore e rinisë antifashiste
"Mirënjohje pafund për një nga partizanet më të reja të LANÇ dhe familje patriotike"
Presidenti i Republikës, Ilir Meta, mori pjesë dje në homazhet e zhvilluara në nder të ndarjes nga jeta të Liri Belishovës. Kreu i shtetit e ka cilësuar zonjën Belishova si një nga emblemat kryesore të rinisë antifashiste.
Presidenti i Republikës ishte dje personalisht në homazhet e organizuara nga familja dhe është përkulur në shenjë respekti para arkëmortit, në të cilin ishte vendosur flamuri kombëtar. Në mesazhin e tij, Meta tha se Liri Belishova vinte nga një prej familjeve të shquara patriotike në Mallakastër dhe që kanë kontribuar në pavarësinë e Shqipërisë. "Me dhimbje të thellë nderova sot një nga emblemat kryesore të rinisë antifashiste, Liri Belishovën, e cila u nda nga jeta dy ditë më parë. Edhe njëherë mirënjohje pafund për një nga partizanet më të reja të LANÇ, vajzë e një familjeje të shquar patriotike të Mallakastrës, me kontribute të spikatura për pavarësinë e Shqipërisë dhe shtetit shqiptar. Dhimbja është edhe më e madhe, kur reflektojmë jo vetëm për zhgënjimin e këtij brezi idealist pas Luftës, por edhe për persekutimin çnjerëzor dhe vuajtjet e patreguara që përjetuan shumë prej tyre!", ka thënë dje në mesazhin e tij Presidenti i Republikës.
HOMAZHET
Të martën, kreu i shtetit ka dërguar këshilltarët e tij në ditën e parë të zhvillimit të homazheve për ndarjen nga jeta të partizanes Liri Belisho- va. Ndërkohë që gjatë ceremonisë ra në sy fakti se nuk mori pjesë asnjë nga përfaqësuesit e lartë të qeverisë shqiptare. Ditën e martë, këshilltarët e Presidentit, gjeneral brigade Piro Ahmetaj dhe Arbër Bashkurti, në emër të Presidentit Meta vendosën një kurorë me lule në nder të zon- jës Belishova. Gjithashtu e pranishme nga Forcat e Armatosura, ishte zv. shefja e Shtabit të Përgjithshëm, Manushaqe Shehu. Në homazhe ishin dhe deputeti i LSI- së, Luan Rama dhe kryetari i Partisë Republikane, Fatmir Mediu, por dhe ish- deputetja demokrate, Majlinda Bregu me bashkëshortin. Presidenti Meta e ka përkujtuar kontributin historik të Lëvizjes Antifashiste, pjesë e së cilës ishte dhe Liri Bel- ishova. "Nderim për atë dhe të gjithë të rejat që u frymëzuan me idealet e lirisë duke iu bashkuar me guxim e idealizëm Luftës Antifashiste për çlirimin e vendit. Ato lanë bankat e shkollave, për të realizuar idealet e tyre, të cilat, për fat të keq, u prenë në mes dhe shumë prej tyre u bënë viktima të një persekutimi çnjerëzor të pabesueshëm, duke përjetuar tragjedi personale dhe familjare", u shpreh Presidenti Meta.