Ramën e pyesin për Tahirin në Bundestagun gjerman FATION BINJAKU
Deputetët: Përse s’iu hoq imuniteti? Rama: Nuk ka imunitet!
Kreu i qeverisë shqiptare, Edi Rama, ka zhvilluar ditën e djeshme takime të rëndësishme, fillimisht në Bundestagun gjerman dhe më pas me Kancelaren Angela Merkel.
Sipas medias gjermane “Tagesspiegel”, takimet nuk kanë shkuar siç duhet për Kryeministrin Edi Rama. Në një shkrim, gazetarja gjermane shkruan se Merkel nuk është angazhuar për bisedimet për hapjen e negociatave për Shqipërinë. Ndërkohë që “Tagesspiegel” thekson se para takimit me Merkelin, Rama kishte takuar presidentin e Bundestagut, VVolfgang Schäuble, dhe anëtarët e Komitetit Europian të Bundestagut. Por media gjermane shkruan se jo të gjithë deputetët janë dakord për të votuar për hapjen e negociatave për Shqipërinë. Mësohet se gjatë bisedës me anëtarët e Komitetit Europian të Bundestagut, është diskutuar dhe çështja e ish- ministrit të Brendshëm, Saimir Tahiri. Burimet bëjnë të ditur se deputetët gjermanë e kanë pyetur Kryeministrin Rama për arsyet pse ish- ministrit Tahiri nuk iu hoq tërësisht imuniteti dhe pse ai u mbrojt nga maxhoranca e majtë. “Si ka mundësi që një ish- ministër dhe deputet, që i bëhen akuza aq të rënda si në rastin e Saimir Tahirit, nuk i hiqet krejt imuniteti, por mbrohet nga maxhoranca qeveritare”, mësohet të kenë pyetur deputetët gjermanë. Por burime diplomatike bëjnë të ditur se Kryeministri Rama është përgjigjur se Tahirit i është hequr plotësisht imuniteti. Në diskutim mësohet të ketë ndërhyrë raporteri për Shqipërinë i Grupit Parlamentar i CDUsë, Thorsten Frei, i cili ka qenë në Shqipëri pak kohë më parë. Mësohet se Frei ka thënë që kërkesa e Prokurorisë së Krimeve të Renda për të dhënë lejen për t’i kërkuar Gjykatës arrestimin e Tahirit ishte refuzuar nga maxhoranca socialiste. “Votimi u bë pasi prokurorët u sulmuan publikisht, gjë që është e papranueshme dhe jashtë standardit europian”. Mësohet të jenë shprehur deputetët gjermanë në seancën dëgjimore me Kryeministrin. PRO NEGOCIATAVE Ndërkohë përfaqësuesit e SPD- së gjermane, parti në koalicionin qeveritar, janë shprehur hapur pro çeljes së negociatave për Shqipërinë. Në mediat gjermane, Josip Juratoviç është shprehur se çelja e negociatave për Shqipërinë do të nxisë demokratizimin e vendit. “Procesi i pranimit nxit demokratizimin e vendit në fushat e sundimit të ligjit, luftës kundër korrupsionit dhe krimit të organizuar”, tha përfaqësuesi i SPD- së, Josip Juratoviç, për mediat gjermane. Gazeta “Tagesspiegel” citon dhe kryetarin e Komitetit Europian të Bundestagut, Gunther Krichbaum, i cili e konsideron fillimin e bisedimeve si të parakohshme. “Krichbaum ka rezerva të konsiderueshme kundër fillimit të shpejtë të bisedimeve. Krichbaum nuk dëshiron të përjashtojë pranimin afatgjatë në BE të Shqipërisë dhe vendeve të tjera të Ballkanit Perëndimor, sepse i gjithë rajoni nuk është më një tokë politike e askujt midis BEsë, Rusisë dhe Turqisë”, shkruan gazetari gjermane.