Macron “rrëzon” Trump në Kongresin amerikan
“Ta bëjmë planetin madhështor përsëri, të respektojmë rregullat”
Presidenti i Francës, Emmanuel Macron, ka mbajtur një fjalim në Kongresin amerikan duke mbrojtur sistemin e bashkëpunimit global mbi tregtinë dhe politikën e jashtme, në një kundërpërgjigje ndaj axhendës së Trump.
Fjalimi i Macron u mbajt në ditën e dytë të vizitës në SHBA, ku marrëdhëniet me Presidentin Trump janë shfaqur shumë të ngrohta. Pritja nisi me një puthje mes dy liderëve, madje Trump i ka fshirë edhe xhaketën Presidentit francez duke qeshur, në praninë e gazetarëve. Në Kongres, duke përdorur sloganin e Trump “Ta bëjmë Amerikën madhështore përsëri”, Macron tha se ishte koha që “Ta bëjmë planetin madhështor përsëri”, duke folur në anglisht dhe duke fituar duartrokitje nga kongresmenët amerikanë. Presidenti francez ka diskutuar paktin e klimës së Parisit, nga i cili Trump ka paralajmëruar se Shtetet e Bashkuara do të tërhiqen. Macron kujtoi se duhet t’u ofronin një plan nipërve dhe mbesave në botë, që planeti të ishte ende i banueshëm në 25 vjet, duke nxitur duartrokitje nga pakica demokratike. Ai gjithashtu mbrojti sistemin e tregtisë globale dhe bëri thirrje për zgjidhjen e problemeve nëpërmjet Organizatës Botërore të Tregtisë, një institucion ky që Trump e quan të padrejtë. “I kemi shkruar këto rregulla. Duhet t’i ndjekim ato”, tha Macron në Kongres. Ai paralajmëroi kundër çdo lufte të re në Lindjen e Mesme dhe theksoi se Franca nuk do të tërhiqet nga marrëveshja e Iranit që Trump e ka quajtur si marrëveshjen më të keqe në histori. “Për Iranin, objektivi ynë është i qartë. Irani kurrë nuk do të posedojë armë bërthamore. Jo tani, jo në 5 vjet, jo në 10 vjet, kurrë”, tha ai duke shtuar se “politika nuk duhet të na udhëheqë kurrë në luftë në Lindjen e Mesme. Ne duhet të sigurojmë stabilitet dhe të respektojmë sovranitetin e kombeve, duke përfshirë Iranin, që përfaqëson një qytetërim të madh. Le të mos përsërisim gabimet e kaluara në rajon. Le të mos jemi naivë. Le të mos krijojmë mure të reja në anën tjetër”, shtoi ai. Macron tha se Trump duhet të nderojë an- gazhimin që administrata e mëparshme u bëri partnerëve të saj me marrëveshjen bërthamore të Iranit, duke përfshirë Francën, kryesisht sepse ishte pakt i iniciuar nga SHBA. “Është e vërtetë se kjo marrëveshje nuk mund të adresojë të gjitha shqetësimet dhe shqetësime shumë të rëndësishme. Kjo është e vërtetë. Por ne nuk duhet ta braktisim atë, pa pasur diçka esenciale dhe më thelbësore. Ky është pozicioni im”, tha Macron, duke marrë duartrokitje. Macron tha se dëshiron të punojë për një marrëveshje më gjithëpërfshirëse bazuar në atë që ai ka diskutuar me Trump. Presidenti i Francës gjithashtu e quajti “iluzion” nacionalizmin dhe foli kundër “lajmit të rremë”. “Ne duhet t’i mbajmë sytë hapur ndaj rreziqeve të reja përpara nesh”, tha Macron.