Debati për TVSH, Rama: Rrisim tavanin e biznesit të vogël mbi 10 milionë lekë
"Me rritjen e tavanit mbi 100 milionë, qëllimi ynë është që ju, nga gënjeshtarë, të ktheheni në aleatë të shtetit"
Kryeministri Rama tha dje se tavani i biznesit të vogël pritet të vendoset mbi 100 milionë lekë të vjetra. Gjatë një takimi me përfaqësues të biznesit të vogël, që ka kundërshtuar përfshirjen në TVSH, kreu i qeverisë tha se deri tani biznesi nuk ka deklaruar xhiron reale të tij.
"Këtë çështje mendojmë se ka ardhur koha ta adresojmë siç duhet, në mënyrë që asnjë biznes i vogël të mos jetë i detyruar të gënjejë. Tavani të rritet mbi 100 milionë dhe me rritjen e tavanit mbi 100 milionë, ju, nga gënjeshtarë, të ktheheni në aleatë të shtetit për të realizuar qëllimin e të gjithë kësaj lëvizjeje. Sepse qëllimi i gjithë kësaj lëvizjeje nuk është për të marrë më shumë lekë nga ju për buxhetin e shtetit. Ne do ta bëjmë në dy muajt që vijnë, përpara se të mbyllet qershori dhe të hapen negociatat. Kështu që, kjo është gjëja që vlen për takimin e sotëm", tha Rama. Sipas tij, qëllimi i kësaj rritjeje të tavanit, është kontrolli i biznesit të madh. "Qëllimi i kësaj lëvizjeje është për të mos lejuar që të mëdhenjtë t'u shmangen detyrimeve ndaj shtetit, se në fund të ditës e dimë shumë mirë se çfarë bëjnë të mëdhenjtë me ju dhe çfarë bëni ju me të mëdhenjtë, duke u bërë bashkëpunëtorë për t'ia hedhur shtetit. Ata jua japin pa faturë dhe ju pranoni, se thoni po e morëm me faturë, do kaloj 8 milionëshin e po kalova 8 milionëshin, u mora në qafë, se duhet të paguaj në taksë sikur jam i biznes i madh. E kësaj historie të shëmtuar, ne duhet t'i japim një fund logjik, edhe një fund ligjor", tha Rama.
SHOQATA
Por kryetar i Shoqatës së Biznesit të Vogël dhe të Mesëm, Albert Nasto, adresoi disa problematika, me të cilat ndeshet sot biznesi. "Nga 2014 deri në 2017 janë mbyllur 82 mijë biznese. Shkaku janë taksat e larta, jo vetëm të qeverisë qendrore, por edhe të bashkive që kanë rritur taksat nga 2- 3 herë. Çmimi i energjisë; na u premtua që do të ulej, por u rrit nga 142 lek, në 182 lekë sot që paguan biznesi. Karburanti, të mos flasim për cilësinë, është më i shtrenjti. Këto dy kolona janë kryesoret për një ekonomi. Rënia e fuqisë blerëse në këtë kohë, edhe për shkak të krizës europiane. 43 për qind ka rënë fuqia blerëse sipas nesh. Korrupsioni është bërë një gangrenë e madhe. Kontrollet e shpeshta, gjobat e majme, ka pasur raste një biznes në 2015 është kontrolluar 9 herë në ditë dhe disa inspektorë, ka 16 lloje drejtorish që kontrollojnë", tha Nasto.
KRYEMINISTRI
Për të gjitha këto shqetësime, Kryeministri pati përgjigjet e tij. "Vetëm në janar- mars, 5663 biznese të reja të hapura. Shifrat zyrtare. Vitin e shkuar, 14 mijë të reja. Shifra totale është më e lartë. Ky është fakt!", tha Rama. Kreu i qeverisë i cilësoi të dështuara protestat e biznesit të vogël. "Ju vazhdojeni protestën, por dy gjëra dua të them: protesta është e dështuar, sepse e vërteta është që shumica dërrmuese e bizneseve të vogla e dinë shumë mirë se për çfarë flitet. Kështu që nuk i ha njeri këto historitë e qepenave dhe të goditjeve nga larg me çizme. Se ku rreh pulsi i kësaj historie, e di shumë mirë çdonjëri, se ju bëni llogari, ju jetoni me llogari, nuk jetoni me propagandë. Të mbyllësh qepena në tregjet bashkiake që s'kanë lidhje fare me TVSH- në, është kollaj. Shkon atje, i gënjen dhe i mbyll qepenat. Por ata nuk kanë lidhje, ata nuk janë fare në skemën e TVSH- së", tha Rama. Sipas tij, qeveria nuk ka rritur asnjë taksë. "Dëgjoj që janë rritur taksat. Më thoni një taksë që është rritur. Më thoni çfarë takse u rrit për biznesin e vogël. E vërteta është që taksat për biznesin e vogël janë ulur, nuk janë rritur. Unë këtu flas si Kryeministër, flas për taksat kombëtare. Tarifat e bashkive janë një temë tjetër. Taksa e biznesit të vogël u bë zero. U hoq tatimi i dyfishtë i tmerrshëm që ishte. U bë zero deri në 5 milionë xhiro dhe u bë 5% nga 5 deri në 8 milionë. Kjo është 100% ulje dhe 50% ulje e nuk flasim për ulje të vogla", tha Kryeministri Rama para përfaqësuesve të biznesit të vogël.