“Rritja ekonomike shtoi punësimin dhe uli varfërinë”

Ahmetaj në Këshillin e Punës: Punësimi kalon nivelin 50% për pjesëmarrjen në forcat e punës

Ministri i Financave dhe Ekonomisë, Arben Ahmetaj, deklaroi dje në mbledhjen e Këshillit Kombëtar të Punës, se rritja ekonomike ka ndikuar në rritjen e punësimit dhe uljen e varfërisë.

Ministri Ahmetaj, duke iu referuar shifrave të raportit ekonomik të Bankës Botërore, tha se pjesëmarrja e forcave të punës është mbi 50 për qind, ndërsa papunësia është në nivelin më të ulët historik. "Tashmë është certifikuar edhe nga raportet e institucioneve të specializuara ndërkombëtare, Banka Botërore dhe Progres- Raporti i Komisionit Europian, vendi ynë e ka lënë pas krizën dhe skenarin grek të 2013- ës dhe është një nga vendet me rritjen më të lartë në rajon. Raporti i Bankës Botërore thekson se Shqipëria është vendi i parë në rajon, që punësimi kalon nivelin e 50 për qind, e lidhur me pjesëmarrjen në forcat e punës, ndërsa papunësia e të rinjve në Shqipëri, megjithëse është akoma e lartë 26 për qind, është më e ulëta në rajon. Në katër vite rresht, pjesëmarrja në forcat e punës është rritur në mënyrë të vazhdueshme dhe në fund të 2017- ës, arriti në 59.1 për qind, ndërsa papunësia është në nivelin e vet më të ulët historik. Falë rritjes ekonomike të shndërruar në punësim, vendi ynë ka vazhduar vit pas viti uljen e nivelit të varfërisë dhe projeksionet e Bankës Botërore janë për një ulje të vazhdueshme të saj edhe në vitet e ardhshme", u shpreh ministri. Kreu i Financave tha se 35 për qind e totalit të vendeve të punës në vend u krijuan në mandatin e parë të qeverisë së majtë. "Punësimi, vetëm në mandatin e parë të qeverisë Rama, janë mbi 200 mijë vende pune. Ju mund ta verifikoni, kushdo mund ta verifikojë, në 1 janar të 2013- ës ishin rreth 420 mijë vende pune, me bordero në Tatime, sot janë mbi 660 mijë, me bordero në Tatime. Pra, në katër vite, janë krijuar mbi 35 për qind e totalit të vendeve të punës në Republikën e Shqipërisë", u shpreh Ahmetaj. Ministri i Financave tha se nuk do të tolerohet që të ketë punonjës të pasiguruar. "Mbetemi të angazhuar që të garantohet puna e denjë, e siguruar me kontribute, për të pasur një pension të denjë, përfshirë dhe vëmendjen për profesionet e vështira si minatorët dhe naftëtarët, për të cilat besoj e keni ndjekur edhe diskutimin që Kryeministri, së bashku me ministrat, ka pasur me grupe interesi, shoqatat dhe sindikatat nëpërmjet interpelancave në platformën ' Shqipëria që Duam'", tha Ahmetaj. Kreu i Financave, Ahmetaj, tha se prioritet mbetet rritja e formimit profesional, sidomos te familjet me ndihmë ekonomike. Ahmetaj ritheksoi se ato familje që dalin nga ndihma ekonomike dhe ndjekin kurs profesional, do të paguhen 5,500 lekë në muaj. "Me ndryshimin e fundit që ne bëmë me vendim qeverie, duke u ofruar të gjithë atyre anëtarëve të familjeve që dalin nga ndihma ekonomike, apo edhe ata që janë në ndihmë ekonomike, të përfitojnë formim profesional në kurse të formimit profesional, duke u paguar nga buxheti i shtetit, për çdo muaj arsimim apo kurs profesional, 55 mijë lekë të vjetra, që është sa gjysma e ndihmës ekonomike. Do të thotë se buxheti i shtetit, qeveria, iu ofron pagesë mujore në këmbim të një kursi profesional, pra, kurs profesional falas dhe pagesë nga buxheti i shtetit, mjafton që ata të bëhen më të punësueshëm nga sektori privat", u shpreh ministri Ahmetaj.