Zhvlerësimi i euros, flet Guvernatori: Mos bëni konvertime të nxituara
Sejko: Forcimi i kursit të këmbimit jo vetëm nga faktorët ekonomikë, edhe nga spekulimet e tregut
Guvernatori i Bankës së Shqipërisë, Gent Sejko, u bëri dje thirrje agjentëve ekonomikë të mos bëjnë konvertime të nxituara në kushtet e mbiçmimit të lekut dhe zhvlerësimit të euros.
Gjatë konferencës për shtyp pas mbledhjes së Këshillit Mbikëqyrës, Guvernatori Sejko tha se forcimi i kursit të këmbimit ka ardhur nga faktorë fondamentalë, si rritja e shkëmbimeve tregtare, turizmit dhe dërgesave të emigrantëve, duke mos përjashtuar edhe spekulimet në treg. Guvernatori Sejko u kërkoi agjentëve të tregut të jenë të kujdesshëm, pasi nga veprimet e nxituara mund të pësonin humbje. "U bëj thirrje gjithë agjentëve ekonomikë, që të mos bëjnë veprime të nxituara paragjykuese mbi nivelin e kursit, pra, të mos bëjnë konvertime të nxitura nga luhatjet e kursit të këmbimit, pasi mund të pësojnë humbje në të ardhmen. Çdo ndikim psikologjik ose nga faktorë të ndryshëm në kursin e këmbimit, i cili është jashtë faktorëve fondamentalë, është gjithmonë i përkohshëm. Dhe në rast se është i përkohshëm, kjo do të thotë që ata agjentë ekonomikë do të bënin veprime të nxituara dhe do të kishin humbje. Ky është postulat dhe ka ndodhur. Por sigurisht, askush nuk e parashikon dot sesi do të shkojë; se ndryshe do të ishim profetë po të parashikonim nivelin e kursit të këmbimit dhe kështu reagimet do të ishin të sakta, edhe për agjentët ekonomikë. Një gjë është e sigurt, që ne kemi flukse të larta hyrëse të euros në ekonomi. Por dhe forcimi ose mbiçmimi i kursit të këmbimit përtej parametrave mund të jetë dhe si pasojë e faktorëve spekulativë në treg. Prandaj dhe një herë, u bëj thirrje agjentëve ekonomikë për të reaguar me zgjuarsi dhe për të marrë masa në vazhdimësi, jo vetëm në një situatë mbiçmimi ose nënçmi- mi, për të ulur rrezikun e kursit të këmbimit në kontratat e tyre, sikurse ndodh në të gjithë botën", u shpreh Sejko. Guvernatori i Bankës së Shqipërisë përjashtoi efektet psikologjikë të masave të uljes së përdorimit të euros te kursi i këmbimit. Guvernatori Sejko sqaroi se këto masa nuk kanë hyrë në fuqi. "Ne kemi parashikuar që strategjia e deuroizimit dhe stimulimit të përdorimit të monedhës kombëtare të ketë një efekt neutral në sistemin bankar dhe sistemin financiar. Kjo, pasi masat që aplikohen mbi rezervën e detyrueshme në valutë kompensohen nga ato në lekë dhe anasjelltas. Ne presim një ulje të pozicioneve në monedhë të huaj në raport me monedhën kombëtare në një afat 3- 5 vjeçar. Përveç faktit që masat nuk kanë hyrë ende në fuqi", u shpreh Sejko.
"Çdo ndikim psikologjik ose nga faktorë të ndryshëm në kursin e këmbimit, i cili është jashtë faktorëve fondamentalë, është gjithmonë i përkohshëm. Dhe në rast se është i përkohshëm, kjo do të thotë që ata agjentë ekonomikë do të bënin veprime të nxituara dhe do të kishin humbje. Ky është postulat dhe ka ndodhur"