Opozita kthehet në Kuvend, PD- LSI paralajmërojnë tension
Vasili: Ligje me dhunë, po shkatërrohet parlamentarizmi
Opozita do të rikthehet sot në Parlament ku ka paralajmëruar një seancë jo normale. Burime nga grupet parlamentare të PD- së dhe LSI- së, bëjnë me dije se opozita nuk do të lejojë zhvillimin e një seance normale, për aq kohë sa ish- ministri i Brendshëm vijon të jetë i lirë dhe ndjek seancat parlamentare dhe gjithashtu katër nga protestuesit e Rrugës së Kombit mbahen në burg.
Sipas të të njëjtave burime, kreu i PD- së, Lulzim Basha, përpara seancës plenare do të thërrasë në një mbledhje Grupin Parlamentar demokrat ku edhe do të vendoset se cili do të jetë qëndrimi në Parlament. Deputetët e Grupit Parlamentar të PD- së kanë vendosur të mbajnë një marrëdhënie të kushtëzuar me Parlamentin, për aq kohë sa protestuesit kuksianë vijojnë të jenë pas hekurave dhe ish- ministri Tahiri është i lirë. Në seancën e sotme, PD nuk do të lejojë deputetët e maxhorancës të flasin, aksion të cilin e mbështet edhe grupi parlamentar i LSI- së. Kreu i Grupit Parlamentar të LSIsë, Petrit Vasili, deklaroi pas mbledhjes së grupit se maxhoranca me çështjet që ka vendosur në rend dite, e ka imponuar anormalitetin e seancës. “Përfundimisht, për zgjedhjen e qëllimtë dhe tinëzare të maxhorancës, ky Parlament ka hyrë në një rrugë anormale dhe e enjtja është pikërisht një ditë anormale, pasi një nga çështjet që është planifikuar të diskutohet është ligji për strehimin social, i cili është futur në mënyrë të dhunshme nga maxhoranca në rend të ditës, duke mbledhur në mënyrë të njëanshme komisionet dhe duke u përpjekur të uzurpojë në të gjitha drejtimet Parlamentin shqiptar. Maxhoranca ka bërë zgjedhjen e saj për shkatër- rimin e parlamentarizmit”, tha Vasili. PARALAJMËRIMI Maji do të jetë muaj që do të sjellë zhvillime të forta politike në dëm të qeverisë. Ky ishte mesazhi që u përcolli pak ditë më parë në Grupin Parlamentar, Lulzim Basha deputetëve të PD- së. Basha informoi deputetët e tij se pritet që në ditët në vijim të shpërthejë një skandal në radhët e qeverisë. “Retë që kanë nxirë qiellin, do të shpërthejnë shumë shpejt”, ka deklaruar Basha. Kreu i PD- së ka udhëzuar deputetët e tij ta përqendrojnë aksionin e tyre vetëm në dy çështje: denoncimin e ish- ministrit Tahiri dhe kërkesën për lirimin e protestuesve kuksianë. Gjithashtu, opozita do të vijojë me denoncimet e saj të deputetëve dhe funksionarëve të PS- së që marrin tenderë dhe koncesione nga qeveria.