Holanda, skeptike për hapjen e negociatave
Tetë deputetët holandezë me mision faktmbledhës në Tiranë
Qeveria holandeze është ekstremisht hezituese për të rekomanduar çeljen e negociatave me Shqipërinë në muajin qershor. Një grup deputetësh nga shtatë partitë kryesore parlamentare në Holandë, janë në Tiranë për një mision faktmbledhës, lidhur me plotësimin e prioriteteve që vendi ynë ka pasur për të çelur negociatat me Bashkimin Europian. Skepticizmin për t’i dhënë një përgjigje pozitive Shqipërisë në muajin qershor, deputetët holandezë ia shprehën në takimet e veçanta që patën edhe Kryeministrit Rama dhe kreut të opozitës, Lulzim Basha. Deputetët holandezë deklaruan pas takimit që zhvilluan me deputetë të maxhorancës dhe opozitës, se pas misionit faktmbledhës që do të zhvillojnë në Tiranë, ata do të zhvillojnë një debat në Parlamentin holandez lidhur me vendimmarrjen që do të ketë për Shqipërinë. “Është bërë një propozim nga Komisioni Europian për çeljen e nego- ciatave dhe për këtë qeveria jonë e ka tashmë pozicionin e saj të shprehur dy javë më parë. Qeveria jonë është ekstremisht hezituese dhe është më hezituese se vendet e tjera në BE. Por nuk është vetëm në këtë situatë. Nëse shohim Francën dhe Gjermaninë, do të shihni hezitim për të hapur negociatat. Prandaj, ne si Parlament vendosëm të organizojmë këtë mision faktmbledhës me anëtarë të 7 partive holandeze, të gjitha partitë kryesore janë këtu. Më pas, ne do të kemi një debat sesi po shkon zbatimi i 5 prioriteteve”, deklaroi deputeti, Pieter Omtzigt, nga Partia Kristian Demokrate. Deputeti holandez refuzoi të bëjë një koment të veçantë për procesin ndaj ish- ministrit Saimir Tahiriri, pasi, sipas tij, një qëndrim për këtë çështje do të shkelte parimin për një drejtësi të pavarur që është edhe një nga kushtet kryesore për Shqipërinë. “Ne i kemi vëzhguar këto raste, por do të ishte shumë e çuditshme nëse ne kërkojmë nga njëra anë që të kemi një gjyqësor të pavarur dhe në anën tjetër të flasim për një emër të veçantë që duhet të shkojë në burg. Është një mesazh që nuk do ta dëgjoni. Nuk mund të thuash që ai person duhet të shkojë në burg, pasi merr ekzakt të kundërtën e asaj që kërkohet, çka përkon me pavarësinë e gjyqësorit”, theksoi deputeti holandez. Deputetja e PD- së, Jorida Tabaku, deklaroi pas takimit me deputetët holandezë, se në emër të opozitës kërkoi një përgjigje pozitive nga Holanda në qershor për Shqipërinë. “Opozita mbështeti hapjen e negociatave dhe u kërkoi që ata të bëjnë të njëjtën gjë në Parlamentin e tyre. Qëndrimi ynë ishte unanim për hapjen e negociatave”, deklaroi Tabaku.