Bulevardi, Veliaj takon drejtorin e “Abu Dhabi”: Do financojë deri në fund projektin
Një ditë pas inaugurimit të segmentit të dytë të “Bulevardit të Ri”, kryebashkiaku i Tiranës, Erion Veliaj, priti në një takim drejtorin e fondit “Abu Dhabi” dhe mori garancinë e mbështetjes së projektit edhe për dy segmentet e mbetura. “Me Fondin e Abu Dhabi- t do të sigurohemi që ta çojmë projektin deri në fund, edhe me një shesh monumental, ashtu siç është sheshi “Nënë Tereza”. Tashmë kemi disa projekte urbanistike që po kthehen në ikonë për Tiranën, si sheshi ‘ Skënderbej’ dhe Bulevardi i Ri. Besoj se me këto dy shtojca të ‘ Zogut I’ dhe të fundit të ‘ Bulevardit të Ri’ me projektin e Lidos, të kemi një kurorëzim të suksesshëm të marrëdhënies me ‘ Abu Dhabi’- n”, nënvizoi kryetari gjatë takimit me drejtorin e operacioneve në botë të Fondit të Abu Dhabit për Zhvillim, Adel Al Husan. Ndërkaq, ky i fundit tha se bashkëpunimi me Tiranën do të jetë më i frytshëm se kaq. Ai zbuloi se është në bisedime me qeverinë për të tjera projekte. “Jemi të kënaqur për partneritetin strategjik me qeverinë e Shqipërisë dhe të gjithë jemi dëshmitarë të një arritjeje të madhe. Një tjetër arritje është bërë në zhvillimin e këtij projekti të bulevardit verior dhe në projektin e rehabilitimit të lumit. Po vazhdojmë diskutimet me qeverinë për projekte të reja. Faleminderit atyre që na dhanë mundësinë për të qenë pjesë e sfidave të tyre të zhvillimit dhe patjetër që do të vazhdojmë të ndihmojmë kolegët dhe vëllezërit tanë në Shqipëri për një të ardhme më të mirë”, tha Adel Al Husan. Kryebashkiaku i Tiranës i shprehu mirënjohjen për dy projektet e sapoinuguruara, që jo vetëm kanë dhënë zgjidhje, por kanë transformuar jetën e një komuniteti të madh banorësh që vuanin çdo herë që binte shi në kryeqytet. Kryebashkiaku theksoi faktin se projekti i rehabilitimit të lumit Tirana nuk përfshin vetëm sistemimin e familjeve që jetonin në shtëpi të ndërtuara në shtratin e lumit, si dhe ndërtimin e skarpateve mbrojtëse, por edhe krijimin e hapësirave çlodhëse dhe argëtuese për banorët e zonës.