Indeksi i Dhomës Gjermane të Tregtisë: Besimi i biznesit u rrit
Rritet vlerësimi për klimën e biznesit, shqetësim taksat e larta
Rritet indeksi i besimit të kompanive gjermane për klimën e biznesit dhe situatën ekonomike në vend për 2018- n. Shoqata Gjermane e Industrisë dhe Tregtisë dje në konferencën për shtyp prezantoi rezultatet e anketës së biznesit.
Përfaqësuesi i Dhomës Gjermane të Industrisë dhe Tregtisë, Harmut Jaroch, tha se nga 20 faktorët e vlerësuar nga biznesi, 13 prej tyre u vlerësuan pozitivisht këtë vit, 5 faktorë shënuan rënie krahasuar me një vit më parë dhe 2 kanë mbetur të pandryshuar. Sipas përfaqësuesit të dhomës Gjermane, nota mesatare e vlerësimit të biznesit u përmirësua në krahisim me 2017- n. "Në anketimin mbi klimën e biznesit, i cili u plotësua nga kompanitë anëtare të DIHA- s në fillim të vitit 2018, pjesa më e madhe e të anketuarve e kanë vlerësuar pozitivisht situatën ekonomike aktuale, krahasuar me një vit më parë. Për sa u përket pritshmërive të ekonomisë shqiptare, kompanitë vërejnë përmirësim të situatës. Pjesa më e madhe e kompanive ka vlerësuar veçanërisht pritshmëritë mbi situatën ekonomike brenda sektorit si më mirë, krahasuar me një vit më parë. Rreth dy të tretat e të anketuarve i janë përgjigjur me "mirë" ose "kënaqshëm" pyetjes mbi situatën aktuale ekonomike në Shqipëri. Ky rezultat tregon një përmirësim krahasuar me vitin e mëparshëm", vlerëso- het në raport. Biznesi vlerësoi se, krahasuar me një vit më parë, janë përmirësuar kualifikimi dhe arsimi i punonjësve, ndërsa vlerësoi si shqetësim barrën tatimore dhe administratën tatimore.
REZULTATET
Pesë faktorë u cilësuan si shqetësues nga biznesi i Dhomës Gjermane të Tregtisë me ndikim në klimën e të bërit biznes si: kostoja e punës, disiplina në pagesa, barra tatimore, sistemi dhe administrata tatimore dhe administrata publike. Referuar rezultatit të anketës, këta faktorë tregojnë një rënie të lehtë krahasuar me një vit më parë. Ndërsa faktorët që shënuan përmirësim ishte kualifikimi i punonjësve, stabiliteti politik dhe social, sistemi i arsimit profesional, infrastruktura dhe siguria ligjore. Për sa i përket situatës për vetë biznesin e tyre, 31 për qind e kanë vlerësuar si më të mirë. Gatishmëria për rritjen e numrit të punonjësve është rritur dukshëm në krahasim me një vit më parë nga 31 për qind në 39 për qind. Nga ana tjetër, vetëm 14 për qind e të anketuarve presin ulje të numrit të punonjësve. Në anketim kanë marrë pjesë 1,421 kompani për 16 përfaqësitë gjermane të tregtisë në Europën Qendrore e Juglindore, nga të cilat 38 ishin nga Shqipëria që përbëjnë 43 për qind të kompanive të anketuara.