Noka: Tahirit s’i duhej imuniteti, ka mbrojtjen politike të Kryeministrit
Nënkryetari i Komisionit të Sigurisë, Flamur Noka, akuzoi Kryeministrin Rama se po vijon të mbrojë nga arrestimi ishministrin e Brendshëm, Saimir Tahiri. Në një dalje për mediat, deputeti demokrat foli për një pazar mes Ramës dhe Tahirit, për të mbrojtur njëri- tjetrin përballë akuzës për kanabizimin e vendit. “Sot është dita e katërt që Saimir Tahiri shëtit i lirë rrugëve të Tiranës dhe nuk arrestohet nga drejtësia e Edi Ramës, edhe pse zyrtarisht është pa imunitet. Mosarrestimi i Saimir Tahirit është dëshmia se ish- ministrit të Brendshëm, trafikant droge, nuk i duhej imuniteti parlamentar, përsa kohë ai ka mbrojtjen politike të Kryeministrit. Fakti se asgjë nuk ka ndryshuar, pavarësisht se Tahiri është pa imunitet, është dëshmia e pazarit RamaTahiri për të mbyllur dosjen e ish- ministrit të Brendshëm”, tha Noka. Sipas nënkryetarit të Komisionit të Sigurisë, Rama është peng i Tahirit, pasi ish- ministri disponon prova për përfshirjen e vëllait të Kryeministrit në trafikun e kokainës. “Edi Rama është arkitekti i kanabizimit të vendit, projekt të cilin e përdori për të blerë zgjedhjet nëpërmjet krimit dhe drogës. Edi Rama është peng i krimit të organizuar dhe Saimir Tahiri ka provat e lidhjes së Ramës me çdo grup të pushtetshëm kriminal në Shqipëri. Edi Rama është peng i dosjes kokaina të Xibrakës, ku është i përfshirë vëllai i tij dhe Saimir Tahiri disponon provat, që lidhin Olsi Ramën me trafikun e kokainës. Janë këto dosje të rënda që detyruan Edi Ramën të zhbëjë Reformën në Drejtësi dhe të marrë nën kontroll të plotë Prokurorinë. Megjithatë, komisioni hetimor parlamentar do të bëjë gjithçka që të provojë se Edi Rama lejoi kanabizimin e vendit për të blerë zgjedhjet dhe se vendi i Edi Ramës është bashkë me Saimirin Tahirin… në burgun 313”, tha Noka.