“Prokuroria të sqarojë, a u vodhën dokumentet hetimore për Dakon?”
Deputeti i Partisë Demokratike, Enkelejd Alibeaj, ka dënuar dje vjedhjen e postës sekrete të Prokurorisë së Durrësit, duke e quajtur si një ndër aktet më të rënda dhe të paprecedentë. Sipas tij, grabitja e materialeve sekrete të Prokurorisë është dëshmia se shteti dhe krimi janë bërë njësh. “Grabitja e postës sekrete në Prokurorinë e Durrësit është një nga aktet më të rënda dhe të paprecedentë në të gjithë historinë e shtetit shqiptar. Nuk ka ndodhur kurrë më parë, as në momentet më kritike të vendit, që të grabiten dokumente sekrete as natën, as ditën. Grabitja e materialeve sekrete për Prokurorinë e Durrësit është dështimi më i madh i rënies së shtetit përballë krimit. Është dëshmia se si shteti dhe krimi janë një i vetëm! Bashkëpunimi i shtetit me krimin ka arritur në nivele të tilla, saqë krimi i organizuar di jo vetëm përmbajtjen e dokumenteve sekrete, por krimi di vendin dhe orën kur ato do të tërhiqen nga korrieri i posaçëm i postës sekrete”, tha Alibeaj.
Demokrati kërkoi nga Prokuroria e Përgjithshme dhe Policia e Shtetit të informojnë publikun se çfarë dokumentesh janë grabitur nga posta sekrete e Prokurorisë. Dhe a kanë ato lidhje me hetimet ndaj Vangjush Dakos apo trafikut në Portin e Durrësit. “Partia Demokratike i kërkon Prokurores së Përgjithshme të Përkohshme dhe Policisë së Shtetit, të informojë menjëherë publikun se çfarë përmbante posta sekrete, kush ishte në dijeni të dokumenteve dhe cili ishte institucioni marrës dhe dërgues. A ka lidhje posta sekrete e grabitur me hetime për kryetarin e Bashkisë së Durrësit, Vangjush Dakon? A ka lidhje posta sekrete e grabitur me hetimet për trafikun e drogës nëpërmjet Portit të Durrësit? Grabitja e postës sekrete për Prokurorinë e Durrësit është një nga shumë provat se marrja e drejtësisë nën kontrollin e Edi Ramës do të thotë se sot drejtësinë e kontrollon krimi i organizuar”, tha Alibeaj. Partia Demokratike ka quajtur si qesharak reagimin e Prokurorisë së Durrësit, e cila tha se materialet e grabitura nuk janë të rëndësishme. “Këtë e provon edhe nxitimi i Prokurorisë së Durrësit për të mohuar rëndësinë e materialeve të grabitura. Deklarata e Prokurorisë është qesharake, sepse grabitësit nuk janë koleksionues të letrave çfarëdo që i shkojnë Prokurorisë. Dokumentet e grabitura kanë rëndësi për aktivitetin kriminal të atij që ka urdhëruar grabitjen e tyre”, tha ai.