Kryeministri paralajmëron drejtorët: Jepuni tapitë, ose largohuni nga puna
Kryeministri Rama paralajmëroi drejtorët e Hipotekës dhe ALUIZNI- t në Kurbin se nëse nuk i pajisin qytetarët me certifikatat e pronësisë dhe legalizimit, do të largohen nga puna. Kreu i qeverisë zhvilloi një takim llogaridhënieje me qytetarët e Laçit, ku mori dhe ankesa nga qytetarët. “Kam një problem me shtëpinë se nuk ma hipotekojnë, më thonë që kam probleme”, iu drejtua një qytetar Kryeministrit. Nga ana e tij, Rama i kërkoi drejtorit të Hipotekës që të japë sqarime rreth rastit të qytetarit. Kreu i Hipotekës tha se prona e qytetarit ka mbivendosje në hartë. “Nesër ne mëngjes zotëria do vijë që të të takojë. Do çosh ekspertët të shikojnë, shko zgjidhe dhe jepi certifikatën. Dhe deri në pasdite, duhet që të zgjidhet dhe të më vijë lajmi mua. Po nuk erdhi lajmi nga ty tek unë, do vij lajmi nga unë tek ti dhe nuk do jetë pozi- tiv”, iu drejtua Kryeministri drejtorit të Hipotekës Kurbin. Një qytetar nga Laçi iu ankua Kryeministrit se i kishte mbetur peng marrja e certifikatës së pronësisë, pasi ishte në pritje të një VKM- je për çmimin e truallit. Përsëri Kryeministri kërkoi në publik sqarime nga drejtori i ALUIZNI- t Kurbin. “Sa i përket rastit në fjalë, i përket procedurës së VKM- së e cila është shitja ose blerja e parcelave, në rastin konkret ku figuron tokë shtet. Është bërë procedura përkatëse, është përcjellë në Drejtorinë e Përgjithshme. Drejtoria e Përgjithshme e përcjell në Kryeministri dhe merret vendimi i Këshillit të Ministrave për shpronësimin e tokës shtet në këtë rast. Pastaj kthehet në Drejtorinë Rajonale Lezhë”, u shpreh drejtori. Nga ana e tij, Kryeministri tha se do të interesohej menjëherë pas takimit se në çfarë faze ndodhet procedura për rastin konkret që pyeti qytetari.