"Zonja" fsheh kartat, Lokateli si regjisor
Me dëshirën dhe grintën që e karakterizon, Xhenaro Gatuzo do të kërkojë të thyejë Maks Alegrin. Dikur e kishte trajner te Milani, ndërsa sot do ta sfidojë për të fituar trofeun e parë në karrierën e tij si "strateg". Në një finale, diferencën e bëjnë detajet, por mbi të gjitha edhe zgjedhjet e dy trajnerëve. "Beteja" ka nisur në largësi, me Masimiliano Alegrin që është i paparashikueshëm për formacionin që do të zbresë në fushën e lojës dhe me Gatuzon që i ka idetë e qarta dhe nuk fsheh asgjë përpara finales.
HIGUAIN NË DYSHIM
Duke qenë se në Kupën e Italisë trajneri Alegri u ka dhënë gjithmonë përparësi zgjedhjeve të dyta dhe formacionit jo titullar, mediat aludojnë se Gonzalo Higuain mund të jetë në stol mbrëmjen e sotme, por gjithçka do të varet nga Mario Manxukiç. Nëse ky i fundit do të jetë në 100% të formës, atëherë do të udhëheqë majën e sulmit. Sipas mediave që janë pranë bardhezinjve, thuhet se në stërvitje Alegri i ka përzier kartat dhe nuk e ka vendosur ende formacionin, por ajo që është kuptuar është skema ( 4- 3- 2- 1). Ai do të luajë me mesfushën me 3 për të pasur sa më shumë prezencë në këtë repart, për t'u bërë ballë muskujve të Kesit dhe zgjuarsisë së Bonaventurës dhe "shpikjeve" të Lokatelit. Pas Manxukiçit ose Higuainit do të luajnë Douglas Kosta dhe Paulo Dibala, ndërsa treshja e mesfushës do të jenë të përhershmit Pjaniç, Khedira dhe Matuidi. Në mbrojtje do t'i besohet sërish Kuadrados dhe dyshes Benatia- Barzalji në qendër. Aleks Sandro në krahun e majtë, ndërsa në portë do të jetë Bufon.
KUTRONE NË SULM
Patrik Kutrone do të udhëheqë "Djallin" për të fituar Kupën e Italisë. Xhenaro Gatuzo do t'i besojë grintës së djaloshit kuqezi për t'i bërë keq mbrojtjes së Juventusit. I vetmi dyshim që ka trajneri kuqezi është roli i mesfushorit përpara mbrojtjes. Bilja është rikuperuar dhe u stërvit me grupin, por në fakt do të jetë Lokateli që do të bëjë rolin e "regjisorit" në formacionin kuqezi. Pjesa tjetër është e pandryshueshme në mesfushë me Kesin dhe Bonaventurën si qendër e majtë dhe e djathtë. Kutrone në sulm do të mbështetet nga Çalhanoglu dhe Suso nga krahët, ndërsa mbrojtja do të ketë të zgjedhurit Kalabria- BonuçiRomanjoli- Rikardo Rodrigez. Përballë Bufonit, në portën tjetër do të qëndrojë ai që konsiderohet pasardhësi i tij, Xhanluixhi Donaruma.