Basha: Fatmir Xhafaj është vetë peshku i madh, kokë e një prej familjeve mafioze
“Shqipëria është i vetmi vend në botë që ka si ministër të Brendshëm vëllanë e një trafikanti droge që nuk arrestohet”
Opozita ka bllokuar dje punimet normale të seancës plenare, duke denoncuar dje shkeljen ligjore, që sipas PD- së ka bërë ministri i Brendshëm, Fatmir Xhafaj, për të shpëtuar vëllanë e tij nga dënimi në Itali.
Kryetari i PD- së, Lulzim Basha, akuzoi dje Xhafën se si kryetari i Komisionit të Reformës në Drejtësi, falsifikoi Kodin e Procedurës Penale, nenin 491, që bën fjalë për “ekstradimet”. Sipas kreut të PDsë, Xhafaj me këtë paligjshmëri i siguroi vëllait të tij garanci për të qenë i paprekshëm dhe për mos u dënuar as në Itali dhe as në Shqipëri. “Për Agron Xhafajn është shtrembëruar Kodi i Procedurës Penale përmes një falsifikimi, një vepre penale të Fatmir Xhafajt për të siguruar paprekshmërinë në mënyrë që ai as mos të ekstradohet në Itali, as të mos vuajë asnjë ditë dënimi në Shqipëri. Shqipëria është i vetmi vend në botë që ka si ministër të Brendshëm vëllanë e një trafikanti droge të dënuar me vendim gjyqësor të formës së prerë, që nuk arrestohet për të vuajtur dënimin”, tha dje Basha. “PESHKU MADH” Për demokratin, Fatmir Xhafaj është peshku i madh dhe bashkë me vëllanë e tij, Agron Xhafën, janë kokat e një prej familjeve mafioze në Vlorë. “Fatmir Xhafaj është vetë peshku i madh, kokë e një prej familjeve mafioze ku i vëllai bën trafikun e kokainës dhe ai vetë falsifikon ligjet për të mbrojtur vëllanë e tij kriminel nga vuajtja e dënimit. Agron Xhafaj është kriminel i dënuar, që i ka shpëtuar vuajtjes së dënimit. Fatmir Xhafaj është kriminel i pandëshkuar. Të dy bashkë janë kokat e një prej familjeve mafioze, që ka shndërruar sot Vlorën në kryeqytetin mesdhetar të kokainës, ku apartamentet, shtëpitë, makinat shkëmbehen për qese kokaine”, tha dje ai. Në fjalën e tij, Lulzim Basha tha se vëllanë e ministrit të Brendshëm e thërrasin “pashai i Vlorës”, pasi ka nën urdhra Policinë e Shtetit dhe Prokurorinë. “Kjo sepse Agron Xhafaj, që e thërrasin “pashai i Vlorës”, trafikanti i drogës, ka nën urdhrat e tij Policinë, duke filluar nga drejtori i Përgjithshëm dhe Prokurorinë në Vlorë e në të gjithë Shqipërinë. Ky është realiteti i shtetit që ka ndërtuar Edi Rama, ku qeveria dhe krimi janë bashkë, të pandashëm, dhe ku rekordet kriminale, personale apo familjare janë kriteri i vetëm i Edi Ramës për marrjen e posteve të larta publike”, u shpreh ai. Teksa po mbante fjalimin e tij, Bashës i përfundoi koha në dispozicion dhe pjesën tjetër të fjalimit e vijoi nëpërmjet “Facebook”- ut. Sipas tij, Fatmir Xhafaj duhet të dilte me pranga në duar nga Parlamenti, pasi ka falsifikuar Kodin e Procedurës Penale. “Normalisht, Prokuroria duhet të vepronte. Fatmir Xhafaj do të duhej të dilte nga kjo sallë me pranga në duar. Por mafia në pushtet i ka marrë masat që kjo të mos ndodhë. Kapja e Prokurorit të Përgjithshëm dhe dje e Prokurorit të Krimeve të Rënda këtë qëllim ka. Kjo është ajo që Raporti i Departamentit të Shtetit e quan – Kapja e shtetit. Ministri i Brendshëm, kokë e një prej familjeve mafioze. Prokuroria, vegël e Kryeministrit dhe ministrit të Brendshëm. Koha po thërret si kurrë më parë. Njerëzit e thjeshtë të këtij vendi të marrin në dorë fatin e tyre. Ose qeveria mafioze e Edi Ramës, ose Shqipëria. Të dyja bashkë nuk mund të zgjasin dhe nuk do të zgjasin më”, u shpreh ai.