Akuzat, Prokuroria nis verifikimet për vëllanë e ministrit Xhafaj
“Sa kohë ministër i Brendshëm është Xhafaj, ligji antimafia nuk vepron ndaj familjes”
Partia Demokratike ka akuzuar dje ministrin e Brendshëm, Fatmir Xhafaj, se po favorizon vëllain e tij dhe nuk po zbaton ndaj tij ligjin antimafia, i cili parashikon sekuestrimin e pasurive kriminale. Demokratët, Enkelejd Alibeaj dhe Gazment Bardhi, thanë dje se Fatmir Xhafaj, pasi falsifikoi Kodin e Procedurës Penale për të shpëtuar vëllain nga burgu, po jep imunitet edhe nga ligji antimafia.
“Fatmir dhe Agron Xhafaj janë subjekt i ligjit antimafia. Sipas ligjit nr. 10192, datë 3.12.2009 ‘ Për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë’, i njohur publikisht si ligji antimafia, Agron Xhafaj është subjekt, ndaj të cilit duhet të zbatohen masat ndaluese. Agron Xhafaj është dënuar me 7 vjet e 2 muaj burgim: 1. Për pjesëmarrje në grup kriminal që kishte për synim trafikun ndërkombëtar drejt Shqipërisë, Italisë, Polonisë dhe SHBA, ku Agron Xhafaj kishte rolin e furnizuesit të grupit kriminal me heroinë. 2. Për drejtimin e një rrjeti të shpërndarësve të lëndëve narkotike heroinë, kokainë, hashash në Bolonja.
3. Për bashkëpunim në transportimin nga Shqipëria në Itali të lëndëve narkotike të llojit heroinë, kokainë dhe kanabis.
4. Për bashkëpunim me persona të tjerë, për mbajtjen në mënyrë të paligjshme, dhënien dhe marrjen e lëndëve narkotike.
Pyetja që shtrohet sot ësh- të: A e ka zbatuar ligjin antimafia ministri i Brendshëm në rastin e Agron Xhafajt? A ka vepruar Policia e Shtetit? A ka vepruar Prokuroria?”, tha dje Alibeaj.
PËRFSHIRJA Sipas ish- ministrit të Drejtësisë, Gazmend Bardhi, edhe Fatmir Xhafaj është subjekt i këtij ligji, pasi sekuestrimi i pasurive aplikohet dhe ndaj familjarëve. “Aktiviteti kriminal i trafikut të drogës, që ka kryer vëllai i ministrit të Brendshëm, automatikisht e bën subjekt të ligjit, vetë ministrin e Brendshëmm Fatmir Xhafaj. Sipas ligjit antimafia neni 3, vetë Fatmir Xhafaj është subjekt i këtij ligji. Neni 3 e thotë qartë se dispozitat e ligjit antimafia zbatohen edhe ndaj pasurive të personave, në pronësi ose të zotëruara në mënyrë të tërthortë nga personat e afërm ( bashkëshorti, fëmijët, vëllezërit, motrat, bashkëjetuesi), për të cilët prezumohet regjistrimi i rremë, përveçse kur provohet e kundërta. Shqipëria është i vetmi vend në botë ku ministri i Brendshëm, përgjegjës për zbatimin e ligjit antimafia, është vetë subjekt i ligjit antimafia”, tha dje Bardhi. Gjatë deklaratës për mediat, deputeti i PD- së, Enkelejd Alibeaj theksoi se: “Sa kohë ministër i Brendshëm është Fatmir Xhafaj, ligji antimafia, nuk vepron ndaj familjes Xhafaj, pavarësisht dënimit për trafik ndërkombëtar droge të Agron Xhafajt. Ata kanë imunitet, kanë fituar paprekshmëri. Agron Xhafaj nuk vuan asnjë ditë nga dënimi, liria, pa- prekshmëria dhe pasuritë e tij janë të garantuara sa kohë ministër i Brendshëm është vëllai i tij, Fatmir Xhafaj. Shqipëria është i vetmi vend në botë ku ministri i Brendshëm, përgjegjës për zbatimin e ligjit antimafia, është vetë subjekt i ligjit antimafia”.