Digjen dy makina në Vlorë, dyshohet për drogë
Ngjarja gjatë natës, mjetet në distancë 100 m nga njëra- tjetra
Shkrumbohen gjatë natës, me lëndë djegëse, dy automjete në afërsi të fshatit Llakatund në Vlorë. Policia bëri të ditur se një furgon dhe një tjetër mjet tip “Volkswagen” u gjetën të djegura mëngjesin e djeshëm, në një distancë vetëm rreth 100 metra larg njëra- tjetrës.
Autorët dyshohet se kanë vepruar pas një trafiku të mundshëm të lëndëve narkotike gjatë natës. Për të humbur gjurmët, ata i kanë spërkatur me benzinë të dyja makinat duke i shkrumbuar ato. Për shkak të distancës së afërt me njëra- tjetrën, grupi i hetimit ka dyshime se bëhet fjalë për një rast të trafikut dhe se të dyja mjetet janë përdorur nga i njëjti grup.
Sipas të dhënave, të dy automjetet janë gjetur në një rrugë dytësore në afërsi të Llakatundit. Ato janë pikasur nga banorë të zonës, dje rreth orës 08: 30, të cilët më pas kanë njoftuar Policinë. Sipas Policisë, të dy automjetet janë shkrumbuar si pasojë e vendosjes së një sasie të konsiderueshme lëndë djegëse ( benzinë). Automjeti tip furgon rezulton i vjedhur në fshatin Babicë dhe është në pronësi të shtetasit me iniciale A. A. Ky i fundit, sipas të dhënave nga grupi i hetimit, e ka konstatuar vjedhjen e automjetit të tij vetëm mëngjesin e djeshëm, nga ku edhe ka sinjalizuar Policinë dhe ka kryer denoncim. Ndërsa makina “Volswagen” kishte targa të një tjetër automjeti dhe jo të vetën, dhe është duke u hetuar se kujt i përkiste. Vendi ku janë gjendur dy makinat e djegura është një rrugë dytësore që të çon nga fshati Llakatund drejt fshatit Bunavi, por është thuajse e papërdorshme edhe nga vetë banorët apo shoferët e zonës, edhe për shkak të amortizimit të saj. Policia konfirmon se dyshimet e para dhe pista kryesore, në të cilën ajo vetë po heton, është ajo e ndonjë trafiku të mundshëm të lëndëve narkotike. Dyshohet se autorët kanë transportuar gjatë natës lëndë narkotike drejt zonës së bregut, e cila më pas është trafikuar me gomone drejt Italisë. Për të humbur gjurmët, autorët i kanë djegur mjetet e vjedhura në një zonë të largët nga Vlora dhe dys- hohet se ata janë larguar me një mjet tjetër që i priste afër vendit.
Policia e Vlorës ka marrë në pyetje pronarin e furgonit, i cili denoncoi vjedhjen e automjetit pranë banesës së tij në fshatin Babicë. Mësohet se ai ka deponuar se furgonin ia kanë vjedhur gjatë natës dhe se ai e ka konstatuar ngjarjen vetëm në mëngjes, kur është zgjuar dhe nuk e ka parë makinën të parkuar disa metra më tej shtëpisë së tij. Zona e Llakatundit njihet si një nga zonat e nxehta sa i përket kultivimit të bimëve narkotike dhe trafikut të saj. Ndaj, edhe kjo mbetet pista kryesore, por aktualisht nga uniformat blu nuk ka ende asnjë person të identifikuar si të dyshuar për implikim në këtë ngjarje.