Regon Basha: Vazhdon loja Rama- Tahiri, mashtrimi i radhës
Kryetari i Partisë Demokratike, Lulzim Basha, e cilësoi lojë të Ramës masën e arrestit shtëpiak për ish- ministrin e Brendshëm, Saimir Tahiri. Në një postim në “Facebook”, Basha shkruan se vendimi i sotëm ( djeshëm) ishte i paralajmëruar nga Partia Demokratike. “Arresti i shtëpisë i Saimir Tahirit nuk është vendim i drejtësisë, por vendim politik i Edi Ramës. Ky është dorëzimi i kontrolluar që paralajmëruam vetëm 3 ditë më parë, pjesë e paktit mafioz Rama- Tahiri”, shkruan Basha në “Facebook”. Bazuar në informacione që vijnë nga vendet partnere, Tahiri ka qenë pjesë aktive e aktivitetit kriminal. “Saimir Tahiri duhet të ishte sot në qeli dhe jo në arrest shtëpie. Qeveri partnere kanë sjellë javët e fundit të tjera prova që rikonfirmojnë se Saimir Tahiri ishte pjesë aktive e organizatës kriminale të Habilajve për trafikun e drogës”, shkruan Basha. Kreu i Partisë Demokratike akuzoi dhe Prokuroren e Përgjithshme për lëvizjet e fundit në Prokurorinë e Krimeve të Rëndë, kur u largua nga drejtimi i saj prokurori që po heton ish- ministrin e Brendshëm. “Arresti i shtëpisë për Saimir Tahirin është mashtrimi i radhës i Edi Ramës ndaj shqiptarëve dhe partnerëve ndërkombëtarë. Kjo është po kështu prova se lëvizjet e paligjshme në Prokurori kanë për qëllim mbylljen e dosjes Tahiri”, shkruan Basha. Sipas kreut demokrat, është Kryeministri Rama ai që është mbrojtës i ish- ministrit të Brendshëm të akuzuar për përfshirje në grupe kriminale. “Tahiri nuk burgoset dhe as nuk dënohet sepse e mbron dhe e ruan Rama. Sepse Tahiri dhe Rama janë një”, shkruan kryetari i Partisë Demokratike.