Kumbaro marrëveshje me Veliajn: Tirana, qendër e kulturës në rajon
Ministria e Kulturës dhe Bashkia e Tiranës janë bërë bashkë për t'i dhënë më shumë hov jetës artistike në kryeqytet. Pikërisht për këtë qëllim ata nënshkruan një ditë më parë një memorandum bashkëpunimi apo manualin që përcakton se si duhet të zhvillohen politikat kulturore në Tiranë, kontribut për të cilin do të japin edhe komunitetet. Përfaqësues të dy institucioneve bien dakord në një pikë, që kombinimi i tyre ka pasuruar ndjeshëm projektet në fushën e artit. "Kemi bërë një financim të paprecedentë ndonjëherë për artin dhe kulturën në Shqipëri. financojmë rreth 99% të kërkesave që na vijnë, por kjo automatikisht ka shumëfishuar ofertat. Nëse më parë njerëzit mezi prisnin një aktivitet në muaj, sot ka dilema për 3- 4 aktivitete në ditë", deklaroi kryetari i Bashkisë së Tiranës, Erion Veliaj. Ai vuri në dukje tashmë se Tirana është kthyer në qendër të kulturës rajonale, ndërsa shprehu dhe ambicien e tij për ta parë kryeqendrën shqiptare të parën në Europë. "Fakti që jemi kthyer jo vetëm në epiqendër të Shqipërisë, por gjithnjë e më shumë po sheshim bileta për opera e teatër te qytetarët e Kosovës, Maqedonisë, të Jugut të Serbisë apo Malit të zi, pikërisht po e kthejmë Tiranën në një kryeqendër të kulturës. Nuk besoj se do të jetë e largët dita ku bashkë me ministren do konsiderojmë seriozisht të aplikojmë Tiranën si një kryeqytet të kulturës në Europë". Për ministren Kumbaro, ky memorandum veç të tjerash mbështet fort skenën e pavarur, gjë që sipas saj ka nisur me kohë. "Në fakt, me Bashkinë e Tiranës kemi dy vjet që po japim modelin më të mirë se si dy donatorët më të rëndësishëm, por edhe politikëbërësit kulturorë janë duke i dhënë një stimul shumë të madh skenës së pavarur". Ky memorandum nuk do të jetë e vetmja lidhje midis dy institucioneve në fjalë. Ministria e Kulturës dhe bashkia do të bashkëpunojnë për disa instalacione të ngjashme te "Renë" përballë Ekspozitës. Veliaj zbuloi se një tjetër objekt arti do të instalohet shumë shpejt te Zogu i Zi, ndërsa për dy javë dy këngëtarët me famë botërore, Rita Ora dhe Ermal Meta, do të performojnë në kryeqytet. Memorandumi që ka si synim përfshirjen e komuniteteve në politikat e artit publik do të jetë në fuqi për një vit e gjysmë.