Viza false në SHBA, Angli e Kanada, goditet rrjeti
Ekzekutohen 7 urdhërarreste, 7 ende nuk janë arrestuar
Një tjetër rrjet i falsifikimit të vizave për në SHBA, Kanada dhe Britaninë e Madhe është goditur dje nga Policia e Shtetit.
Gjatë orëve të pasdites janë ekzekutuar 7 urdhërarreste të Prokurorisë së Krimeve të Rënda, ndërsa operacioni ka vijuar gjatë gjithë natës për arrestimin e 7 personave të tjerë. Burime nga Policia thanë se mes të arrestuarve është edhe një efektiv policie. Mësohet se gjatë operacionit është zbuluar edhe baza ku prodhoheshin dokumentet e falsifikuara, në zonën e Kodrës së Diellit, në Tiranë, si dhe dy laboratorë që funksiononin për këtë qëllim. Grupi prej 14 personash po hetohej prej 18 muajsh nga Antikrimi Ekonomik dhe Prokuroria e Krimeve të Rënda. Ndërsa prokurori që ka drejtuar hetimet, Vladimir Mara, ka kërkuar arrestimin e 14 personave, pasi janë siguruar provat e nevojshme për implikimin e tyre. Emrat e personave të arrestuar nuk u bënë publikë nga Policia e Prokuroria, për shkak se mund të rrezikohej largimi i 7 personave të tjerë, të cilët nuk janë arrestuar ende. Ky është operacioni i dytë i kësaj natyre, pas atij të muajit mars, gjatë të cilit u arrestuan 39 persona.
HETIMI Prokuroria e Krimeve të Rënda firmosi dje 14 urdhërarreste për personat e përfshirë në një rrjet të falsifikimit të vizave, të cilët po hetoheshin prej një viti e gjysme. Operacioni i Policisë për ekzekutimin e këtyre urdhrave nisi pasditen e djeshme dhe u arrestuan 7 persona. Burimet thanë se ky grup e kishte bazën në zonën e Kodrës së Diellit dhe dy laboratorë që shërbenin për prodhimin e vizave për në SHBA, Kanada dhe Britaninë e Madhe. Mësohet se personat e dyshuar merrnin nga 5 mijë deri në 20 mijë euro për dokumentet false, në varësi të destinacionit të personave të interesuar. Shumica e personave që merrnin viza të tilla, fillimisht pajiseshin me pasaporta italiane. Urdhri për të ndërhyrë dje, ndonëse hetimet nuk ishin mbyllur ende, erdhi pasi pati informacione se një person po largohej nga Shqipëria me pasaportë ital- iane të falsifikuar. Për këtë arsye u vendos që të kryhej ndalimi në flagrancë dhe nisën ekzekutimet e urdhërarresteve. Burimet thanë se po hetohen edhe 4 persona që janë pajisur kohët e fundit me dokumente të falsifikuara, ku një prej tyre u kap në Suedi dhe një tjetër në Norvegji.