Vasili: Ulsi Manja me gënjeshtra, partizanllëk diletant dhe provincial
Nënkryetarja e Kuvendit, Vasilika Hysi dhe kryetari i Komisionit të Ligjeve, Ulsi Manja, në një konferencë të përbashkët, kanë sqaruar dje ndryshimet në Kodin e Procedurës Penale, pikërisht nenin e denoncuar nga Partia Demokratike si të falsifikuar qëllimisht nga Fatmir Xhafaj.
Nënkryetarja e Kuvendit, Vasilika Hysi, njëherësh relatore e Kodit të Procedurës Penale, tha se me këtë nen është përafruar legjislacioni europian. “Projektligji që është depozituar në emrin tim, nuk reflektonte sa duhet protokollin shtesë për ekstradimin. Për këtë arsye, është kërkuar që neni 491 të rishikohet, me qëllim që të jetë në përputhje me protokollin shtesë të ekstradimeve. Ne nuk kemi bërë asgjë tjetër, veçse kemi transplantuar protokollin shtesë, ku personi i kërkuar mund ose jo të ekstradohet. Ajo që është diskutuar gjatë nga demokratët është fjala ‘ falsifikim’, pra, që është falsifikuar nga Xhafaj projekti. Kjo nuk është aspak e vërtetë”, tha Hysi. Më tej, socialistja tha se ligji nuk është falsifikuar, por ai është përmirësuar. “Nuk arrij të kuptoj qëndrimin e kolegëve të opozitës, që kanë në emailet e tyre dhe në tavolinat e tyre të punës të gjitha nenet e amenduara dhe të diskutuara. Në këtë kuadër, unë nuk kam çfarë të them tjetër, ligji nuk është falsifikuar, por është përmirësuar”, u shpreh Hysi.
AKUZAT Kryetari i Komisionit të Ligjeve, Ulsi Manja, tha se neni për të cilin i referohet opozita, është reflektuar në dokumentacionin e shpërndarë grupit të ekspertëve më 12 mars dhe ekspertëve të EURALIUS- it dhe OPDAT- it. Madje, Manja tha se asokohe ky ndryshim është konsultuar dhe me LSI- në dhe Ministrinë e Drejtësisë, që ka qenë Petrit Vasili. “Në datën 12 mars, një ditë përpara sesa Komisioni i Ligjeve të fillonte diskutimin dhe miratimin në parim të projektligjit për disa ndryshime në Kodin e Procedurës Penale, ka qenë i shpërndarë në variantin e integruar, relatorëve, misionit të EURALIUS- it, OPDAT- it, deputetëve të LSI- së sepse PD- ja në atë kohë e ndiqte miratimin e këtij projektligji nga çadra, por edhe Ministrisë së Drejtësisë, që në atë kohë drejtohej nga LSIja”, tha dje Manja.
Kryetari i Grupit të LSI- së, Petrit Vasili, ka reaguar dje për konferencën e Usli Manjës dhe Vasilia Hysit, të cilët kanë justifikuar ndryshimet ligjore në nenin 491 të Kodit të Procedurës Penale. Me anë të këtij neni opozita, ka akuzuar ish- kryetarin e Komisionit të Ligjeve, ministrin e Brendshëm Fatmri Xhafaj, se ka falsifikuar nenin, me të cilin ai shmang ekstradimin e vëllait të dënuar në Itali. Vasili, nga një konferencë në zyrat e LSI- së, tha se Ulsi Manja mashtroi opinionin publik, me dokumente dhe emaile që, sipas tij, janë të sajuara. Më tej, kreu i Grupit të LSI- së, ka thënë se Ulsi Manja është i gatshëm të mashtrojë për të ruajtur vendin e tij në Kuvend. “Dëgjova me shumë kërshëri edhe gënjeshtrën e Ulsi Manjës, i cili për shkak të qejfit të madh dhe të partizanllëkut diletant dhe provincial, është gati të shkatërrojë jo Reformën në Drejtësi, por të gjitha reformat që janë në këtë vend, boll që të rrijë në Parlament dhe të vegjetojë atje, punë e tij, çfarë tha? Tha që iu kemi dërguar email të gjitha ministrive. Më citoi dhe mua, që kur kam qenë ministër i Drejtësisë, më ka çuar email. Po kanë çuar email, por nuk kanë marrë në asnjë rast një miratim, ku ne t’u themi: po jemi dakord, me këtë ndryshim që ju propozoni. Kanë çuar qindra emaile dhe nëpërmjet qindra emaileve, kanë çuar email edhe në Ministrinë e Drejtësisë”, tha dje ish- ministri. Ai ka shtuar se ka pasur debate gjatë diskutimit të reformës, kur sipas tij socialistet donin të përgjonin në ambientet private të shqiptarëve. “Nuk qe i zoti, gënjeshtari, që të nxirrte qoftë dhe një rast të vetëm, një miratim që Ministria e Drejtësisë në atë kohë kishte dhënë. Po, kam pasur një betejë, edhe me Ulsi Manjën, edhe me Fatmir Xhafën dhe Vasilika Hysin etj. kur isha ministër i Drejtësisë, ku kërkohej të futeshin përgjuesit nga të gjitha anët, deri te krevatet e shqiptarëve, ku kërkonin të ligjëronin dëshmitarë anonimë, të cilët mund të shpifnin dhe të çonin njerëzit në burg, duke ripërsëritur kohën e Partisë së Punës. Po, për këto kam qenë në dijeni, kam luftuar dhe nuk kam lejuar që të miratoheshin”, tha Vasili.