“Synohet rritja ekonomike 5 %, duhet zhvillim i tregjeve”
Kreu i AMF: Tregjet do transformohen në promotor të ekonomisë
Autoriteti i Mbikëqyrjes Financiare prezantoi dje strategjinë 5- vjeçare të zhvillimit të AMF- së dhe tregjeve nën mbikëqyrje për periudhën 2018- 2022.
Kryetari i Autoritet të Mbikëqyrjes Financiare, Ervin Koçi, tha se strategjia synon të nxisë zhvillimin e tregjeve financiare, për t’i kthyer në promotor të ekonomisë. “AMF synon që implementimi i kësaj strategjie të nxisë zhvillimin e një tregu konkurrent dhe efecient, duke krijuar njëkohësisht stabilitet afatgjatë si dhe duke i dhënë mundësi krijimit dhe zhvillimit të produkteve inovative. Autoriteti është i bindur se zbatimi i kësaj strategjie, e shoqëruar çdo vit me prioritete të qarta e me një plan konkret veprimi, do të transformojë tregjet financiare që ne mbikëqyrim duke i kthyer në promotor të zhvillimit ekonomik të vendit si dhe autoritetin në një model pozitiv të funksionimit të një mbikëqyrjeje efektive”, u shpreh Koçi. Kreu i Autoritetit të Mbikëqyrjes Financiare vlerësoi se zhvillimi i tregjeve financiare është në projektin e qeverisë për rritjen ekonomike në 5 për qind. “Sot ne kemi klimën e nevojshme për të arritur objektivat e secilit prej grupeve të interesit: Ministria e Financave dhe qeveria e kanë në prioritet zhvillimin e tregjeve financiare si pjesë e projektit të zhvillimit ekonomik për të arritur 5% në rritjen ekonomike. Investitorët dhe aksionarët janë shumë entuziastë për zhvillimin e tregjeve. Ne si autoritet jemi të vetëdijshëm që duhet të vazhdojmë të përmirësohemi me ritme më të shpejta. Partnerët ndërkombëtarë presin ndryshimet e duhura, duke na mbështetur në çdo hap tonin, si dhe publiku pret shumë e më shumë. Këto objektiva bashkohen në një pikë: mbrojtja konsumatore dhe e investitorit”, u shpreh kreu i Autoritetit të Mbikëqyrjes Financiare. Ndërsa, kryetari i Bordit të AMF- së, Pajtim Melani, duke vlerësuar me shifra arritjet e deritanishme, theksoi hapjen e së parës bursë me kapital privat si një ndër arritjet më të spikatura të vitit të kaluar. Melani deklaroi se AMF do ta shoqërojë hartimin e kësaj strategjie me një plan konkret veprimi, për të arritur objektivat e vendosura.