Arrihet marrëveshja, farmacistët do rimbursohen nga Fondi
Pas bisedimeve disaditore, farmacistët e kanë gjetur “të mesmen e artë” me Fondin e Sigurimeve të Detyrueshme të Kujdesit Shëndetësor. Lajmin e mirë të arritjes së marrëveshjes e dha kreu i Urdhrit të Farmacistit, Diana Toma, e cila tha se shumë shpejt do të ngrihet një grup pune për të gjetur formën e rimbursimit të farmacive për dëmin që u shkaktohet nga diferencat në çmime sipas listës së aprovuar nga ministria. “Diferencat në minus u hoqën. Sa u takon dëmeve në vijueshmëri të përvitshme që sjell mbi subjektet farmaceutike futja e listës së re të barnave me rimbursim, do të gjendet një akt përpilimi për të gjetur formën e rimbursimit të farmacisë për dëmin që iu shkaktohet”. Për kreun e FSDKSH- së, Eduart Ahmeti, pakënaqësitë e farmacistëve janë akumuluar në vite, ndërsa kontrata aktuale nuk shkel të drejtat e tyre. “Kemi dakordësuar disa kërkesa të farmacistëve, të cilat kanë qenë në fakt të bëra në vite, një pjesë e të cilave i kemi marrë parasysh. Por theksoj se Fondi është i vendosur për pacenueshmërinë e parimeve, te të cilat ai bazohet në përmbushje të funksionit të vet. E rëndësishme është që palët të sqarohen dhe të kuptojnë qartë të drejtat dhe detyrimet që rrjedhin nga kjo kontratë, që janë reciproke të sanksionuara prej vitesh dhe për hir të së vërtetës, nuk e kanë penguar procesin kontraktual, përkundrazi e kanë disiplinuar”. Sakaq, farmacistët janë në pritje të zbardhjes së kontratës së re, të cilën e kërkuan gati për katër ditë, me qëllim për ta rishikuar dhe firmosur. Ndërkohë që zhvilloheshin negociatat me dyer të mbyllura në Ministrinë e Shëndetësisë, farmacistët me kontratë me FSDKSH- në zhvilluan protestën e paralajmëruar duke mbyllur për dy orë qepenat, nga 11: 0013: 00. Pakënaqësisë i janë bashkuar edhe farmacitë në rrethet Tiranë, Lushnjë, Berat, Fier, Vlorë dhe Sarandë, ndërsa pati edhe nga ata që e bojkotuan atë.